El partíu entamaba con unos primeros minutos de tanteo, nos que primaba la defensa en dambos conxuntos y les ocasionesnun yeren enforma clares. Col pasu de los minutos el xuegu foi abriéndose y el Compostela adelantábase al culminar una contra. Poco dempués, los gallegos disponíen de 2 minutos de superioridá, pero non solo nun lo aprovechaben, sinón que’l Telecable llograba igualar el marcador per mediación de Fidalgo. El Telecable parecía dominar nel xuegu, dientro de la igualdá ente dambos conxuntos, y Dani Hoyos aprovechaba p’anotar el so primer gol del partíu de potente disparu, aunque poco dempués Uxío Corral tresformaba una falta directa nel gol que devolvía les tablas al partíu, col 2-2 enel lletrónicu llegábase al descansu.
La segunda metá comenzaba de forma mucho más dinámica, con dambos equipos buscando la portería contraria de forma más directa, anque yera’l cuadru llocal el que llevaba la batuta nel xuegu y xeneraba mayor pelligru, si bien los gallegos intentábenlo en transiciones ya individualidades. Asina, Dani Hoyos llograba dos tantos que poníen el partíu muy de cara pal Telecable, pero’l Compostela volvía a da-y emoción al partíu al recortar distancies a falta de 10 minutos. Supo controlar bastante bien el conxuntu asturianu’l pelligru del Compostela, pero cuando restaben 2 minutos de xuegu, un disparu llateral se colaba na portería defendida por Gelete. El Telecable tuvo ambición y nun duldó en dir a pol partíu, presionando a toda cancha y con mucha verticalidá n’ataque, llegando’l premiu a falta de 19 segundos en forma de gol, convertíu por David Villamil tres asistencia de lluxu de Adrián Varela.
Importante victoria de los xugadores de Nuno Canelas, que sitúa al Telecable H.C. con 6 puntos de 6 posibles nuna OK Liga Bronce que se prevé muy igualada.
