El Telecable imponse nel tornéu Villa de Xixón

La final empezó con muncha intensidá per parte de dambos conxuntos

0
751
El Telecable impónse nel Villa de Xixón.
La plantiya del Telecable, celebrando la victroria. / Telecable H. C.

El Telecable H. C. fíxose esti domingu cola victoria nel XXII Tornéu Alusigma – Villa de Xixón depués d’imponese al Gurutzeta. La final empezó con muncha intensidá per parte de dambos conxuntos nos que los porteros emplegáronse a xeitu nestos primeres compases. Frutu d’unu de los ataques resultó nel primer gol del Gurutzeta, que batió a Gelete d’un tiru rasu cruzáu. Magar esa ventaya inicial, dambos equipos siguieron marcando una intensidá bien elevada, que yera esfrutada pol públicu na grada.

Tardaron los locales, sicasí, diez minutos n’establecer la igualada. Adri, nuna xugada na qu’aprovechando’l tracamundiu nel área rival, consiguía llevar la bola al fondu de la rede. Poco depués, en xugada similar Souto supera nuevamente al porteru vascu. El Gurutzeta recompúnxose perbién. L’equipu volvió establecer la igualada nel marcador a poco de reinciarse el xuegu saliendo dende’l mesmu campu en xugada personal na que se llantó frente a Gelete ensin posibilidá de reacción d’ésti. Dambos equipos llegaron al descansu coles tables momentanees nel marcador.

La final empezó con muncha intensidá per parte de dambos conxuntos nos que los porteros emplegáronse a xeitu

Na continuación, el Gurutzeta safóse de la presión local. En dos contraataques perbién llevaos marcaba dos goles n’apenes trés minutos, dexando’l marcador en 2-4. Tampoco’l Telecable perdía intensidá. Adri xubió dos goles más nel marcador nuna contra en primer instancia y de siguío una xugada na qu’un pase atayáu terminó no fondero de la rede. Con tables nel llectrónicu empezó una dinámica esplosiva per parte de dambos conxuntos con hasta cinco llanzamientos a portería.

Los continuos ataques, sicasí, non fructificaban pa nengún equipu hasta qu’a menos de seis minutos pal final del alcuentru, Varela bate de tiru rasu cruzáu dende fora de la área la meta vasca. Poco dempués nuna bona xugada, una combinación termina con asistencia a Abel, que remata de forma impecable al fondu de la rede poniendo un 6-4 a poco más de cinco minutos del final del partíu. Entá’l Gurutzeta llantaría cara nel alcuentru y marcaría un tantu más nun refugue a un llanzamientu na área local, lo que espoleó al equipu pa tratar de consiguir l’empate, pero nun se movió más el marcador, dexando finalmente’l tantéu nel definitivu 6-5.

L’Alcalá acabó terceru y cuartu el Santutxu, dexando pa l’alcordanza un tornéu d’una calidá estraordinaria.  José Luis Souto, presidente del Club apurría los trofeos al tercer y cuartu clasificaos, ente que José Polanco, presidente de la Federación de Patinaxe del Principáu d’Asturies apurría’l troféu de segundu clasificáu al Gurutzeta. Fernando Zufia, apoderáu de la empresa Alusigma, foi l’encargáu d’entregá-y el troféu como primer clasificáu al Telecable.