L’Asociación Española de Contabilidá y Alministración d’Empreses (AECA) premió a trés alumnos de la Facultá d’Economía y Empresa de la Universidá d’Uviéu col Galardón al meyor espediente académicu por grupu”, que reconoz la escelencia académica y desempeñu de los alumnos matriculaos en 4º cursu del grau de Contabilidá y Finances (CyF) y del doble grau ADE-Derechu. Esta distinción convócase dientro del Programa Internacional de Beques AECA pa estudiantes universitarios d’Alministración d’Empreses (PIBE-AECA). 29ª Edición. 2022” nel que tán inscrites 32 universidaes.

María Gómez, María Palacio y Álvaro Ursueguía son los alumnos galardonaos de la Universidá d’Uviéu n’evaluando tolos espedientes académicos presentaos polos distintos departamentos universitarios participantes, que fueron 10 nesta edición del premiu. El galardón, que’l so oxetivu ye sofitar la incorporación del talentu al mercáu llaboral, pon de manifiestu’l gran interés de los mozos por esti sector.

“Gustaríame poder trabayar en dalguna de les compañíes referencia del sector y nun futuru poder montar la mio propia empresa”, destaca Álvaro Ursueguía. La so compañera, María Palacio, nun refuga siguir estudiando o “preparar dalguna oposición pa l’Alministración Pública. Y, si non, empezar directamente a trabayar nel sector priváu”. Pela so parte, María Gómez entiende’l premiu como una reconocencia al so esfuerzu: “Recuérdame que pudi y, por tanto, faime ver que tou con esfuerzu y constancia ye posible”. Amás del diploma correspondiente, los equipos participantes tienen derechu a la inscripción gratuita a “RETU 2022”, un proyectu-xuegu internacional de simulación empresarial entamáu por Companygame. AECA pon tamién los sos currículos a disposición de les entidaes patrocinadores del Programa internacional de Beques PIBE-AECA.