Trés persones resultaron mancaes de diversa considerancia, una con pronósticu reserváu y dos leves, nun accidente de tráficu rexistráu na N-634, al altor del puntu kilométricu 371, en Cecea, Nava.
Según los datos facilitaos pol Serviciu d’Atención Médica Urxente (SAMU) los trés mancaos fueron treslladaos al Hospital Universitariu Central d’Asturies (HUCA), n’Uviéu. La ferida de mayor considerancia ye una muyer de 48 años d’edá. Foi treslladada, con pronósticu reserváu, por cuenta de más pruebes y hasta nueva valoración médica, na UVI-móvil d’Uviéu, tres facer tresferencia con una ambulancia de soporte vital básicu.
La muyer, conductora d’unu de los vehículos implicaos nel accidente, foi escarcelada del so interior por efectivos de Bomberos del Serviciu d’Emerxencies d’Asturies (SEPA) con base nel parque de Piloña. En inmovilizándola con collarín y chalecu espinal estrayéronla, cola tabla de rescate, pela parte trasera del turismu.
Los otros dos mancaos, un varón de 46 y una muyer de 41, tamién fueron atendíos nel llugar pol equipu d’Atención Primaria de Nava y treslladaos con pronósticu leve, a falta de más exames, na ambulancia de soporte vital básicu de la zona al HUCA.
