Un ciclista resultó mancáu, en sufriendo una cayida, na ruta de la vía La Carisa, llegando a Carabanzo, en L.lena. L’afectáu, que presenta un traumatismu craneoencefálico, foi evacuáu pol Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, al HUCA. Por cuenta de más pruebes y hasta nueva valoración médica’l so pronósticu ye reserváu.
El Centru de Coordinación d’Emerxencies recibió l’avisu a les 14.19 hores. Na llamada indicóse qu’un ciclista accidentárase na ruta de la vía de La Carisa. Darréu movilizóse a un Bomberu del parque de Mieres pa treslladase a la zona, nun touterrén, al médicu de L.lena, yá qu’hasta’l llugar ésti yera l’únicu tipu de vehículu que podía aportar. Coles mesmes informóse de lo qu’asocedía al Grupu de Rescate de Bomberos del SEPA, a bordu del helicópteru medicalizáu, que taba de regresu d’una intervención n’Amieva.
Finalmente hasta la zona llegó l’equipu de rescate y nun foi precisa otra intervención. El médicu-rescatador, al pie de los bomberos-rescatadores, atendió al afectáu, al qu’inmovilizaron con un collarín. Los integrantes del grupu ayudaron al accidentáu a xubir a l’aeronave, para’l so treslláu al HUCA.
El grupu de rescate dio por rematada la intervención a la so llegada a base, a les 15:35 hores. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU) qu’activó al médicu y l’ambulancia de soporte vital básicu de L.lena.
