El conductor y únicu ocupante d’un turismu finó ayeri nueche en topetando’l coche que conducía, por causes que se desconocen, contra’l muriu d’una vivienda en La Riera, Colunga.
Cuando llegaron al llugar efectivos de Bomberos el Serviciu d’Emerxencies del Principáu d’Asturies (SEPA) l’home, un varón de 70 años, taba inconsciente polo que lo estrayeron rápido cola maniobra de rautek y empezaron a realiza-y maniobres de reanimación cardiopulmonar hasta la llegada de los servicios sanitarios.
El Serviciu d’Atención Médica Urxente (SAMU) movilizó l’equipu médicu de la UVI-móvil de Les Arriondes, l’equipu d’Atención Primaria de Colunga y l’ambulancia de soporte vital básicu de Ribeseya. Finalmente namás pudieron confirmar el so fallecimientu. La Guardia Civil fíxose cargu de los trámites pa proceder al llevantamientu del cadabre.
El Centru Coordinación d’Emerxencies del 112 Asturies recibió l’avisu a les 22:49 d’ayeri domingu. Na llamada señalaben qu’un turismu empotrárase contra’l muriu d’una vivienda y el so conductor taba nel interior.
La Sala 112 del SEPA pasó l’avisu al SAMU y unvió a los bomberos del parque de Villaviciosa. Cuando la dotación llegó al llugar y en falando col SAMU dieron en escarcelar al conductor y empecipiaron maniobres de RCP hasta la llegada de los sanitarios.
