Un futuru pa los horros

Cultura anuncia la constitución de la Mesa del Horru pa tratar la regulación d’estos elementos etnográficos

0
312

El futuru de los horros va debatise nuna mesa de nueva creación entamada pola Conseyería de Cultura, Política Llingüística y Turismu. Esti organismu va analizar los asuntos sobre los que se va sofitar la normativa futura que tien que regular la xestión patrimonial d’horros y paneres, garantizar el so futuru y salvaguardar el so valor cultural. La Mesa del Horru va tar integrada por espertos, profesionales y representantes d’asociaciones y entidaes de dellos ámbitos rellacionaos col estudiu, la restauración y el caltenimientu d’estos elementos.

L’organismu va trabayar, sobre manera, a partir de dellos documentos técnicos ellaboraos nos últimos años. Ún de los principales retos ye tratar cuestiones relevantes que nunca se regularon espresamente, como los usos permitíos, la evolución de les tipoloxíes, la concreción de materiales y sistemes de restauración o’l calter mueble-inmueble d’horros y paneres.

La Mesa del Horru va tener en cuenta sobre manera trés documentos: Registro de soluciones técnicas tradicionales para el montaje de hórreos y paneras, de Gonzalo García y Santiago Astuy; El lenguaje clásico del hórreo asturiano. Serie tipológica y quintana, de Juan Pedrayes, Ástur Paredes y Salvador Barro, y Documento marco de recomendaciones sobre la gestión de bienes patrimoniales de carácter etnológico: hórreos y paneras, de Cristina Cantero. Estos trabayos van facese públicos nuna páxina abierta por Patrimoniu cola mira de facilitar les aportaciones ciudadanes al debate.

L’organismu va tener que tomar determinos sobre aspectos como si tienen que regulase dende Patrimoniu los horros de construcción nueva o si l’horru nuevu sigue siendo horru; si puen añedise elementos como un zarramientos o ventanes y siguir considerándolu horru; sobre’l so usu, incluyíu’l habitacional o como agospedamientu rural singular, o la posiblidá de graduar la so protección a tenor de criterios como l’antigüedá, la decoración o’l so allugamientu.