Un kamikaze muerre nun accidente con cinco mancaos na ‘Y’

0
211
Un kamikaze muerre nun accidente con cinco mancaos na 'Y'
Un kamikaze muerre nun accidente con cinco mancaos na 'Y'

Sustu a medianuche n’autopista A-8 en Xixón. Un conductor morrió dempués de provocar un accidente a las 23.37 hores de la nueche. Los fechos ocurrieron al altor del puntu kilométricu 392,200, en sentíu Avilés. Al paecer, l’home, de 52 años, circulaba en sentíu contrariu a 200 km/h dende’l túnel de Ribón (Valdés) cuando chocó contra otros dos vehículos.

Cinco persones resultaron mancaes. El de mayor considerancia ye un varón de 69 años d’edá que tuvo que ser treslladáu al Hospital San Agustín. El so pronósticu ye grave. L’home, conductor d’ún de los coches implicaos nel accidente, foi escarceláu por efectivos de Bomberos del Conceyu de Xixón. Nesti vehículu viaxaba una muyer que foi treslladada al Hospital Universitariu Central d’Asturies (HUCA) n’Uviéu. A falta de más exames y hasta nueva valoración el so pronósticu ye reserváu. Los otros trés mancaos de calter leve son un varón de 48 años d’edá y dos menores de 4 y 5 años que viaxaben nun tercer vehículu implicáu nel accidente. Los trés fueron treslladaos n’una ambulancia al HUCA.

El fináu, un varón de 52 años d’edá, foi escarceláu, en recibiendo la correspondiente autorización, por Bomberu del Serviciu d’Emerxencies del Principáu d’Asturies (SEPA) con base nel parque de Llamorgal. Los sos restos mortales fueron treslladaos al Institutu de Medicina Llegal n’Uviéu.