Un home resultó mancáu de considerancia en rexistrándose una esplosión, por circunstancies que se desconocen, na caldera de la so vivienda allugada en Celoriu, Llanes.
Según los datos facilitaos pol Serviciu d’Atención Médica Urxente (SAMU) l’afectáu, un varón de 62 años d’edá, presenta, por cuenta de más pruebes y hasta nueva valoración médica, quemadures de tercer grau nel 50% del so cuerpu. El so pronósticu ye grave. Foi atendíu nel llugar del accidente pol equipu d’Atención Primaria de Llanes que lu treslladó na ambulancia de soporte vital básicu hasta la localidá de Po, onde lo recoyó l’helicópteru medicalizáu del SEPA pa treslladalu al HUCA, n’Uviéu.
Hasta la vivienda tamién se movieron efectivos de Bomberos d’Asturies del parque de Llanes y el Xefe de Zona Oriental. Los bomberos desenchufaron la caldera y comprobaron cola cámara d’imaxes térmiques que nun hubiera nengún puntu de calor. Quemara tan solo una espluma que-y taben echando a la máquina.
El Centru de Coordinación d’Emerxencies del 112 Asturies recibió l’avisu a les 11.11 hores. Na llamada indicaben que se produxera una esplosión n’una caldera de gasoil y había una persona mancada con quemadures.
La Sala 112 del SEPA pasó l’avisu al SAMU qu’unvió los medios yá citaos y movilizó una dotación de bomberos del parque llaniscu. Tamién informó al Xefe de Zona Oriental que se movió al llugar y a la Policía Local.
