Un mancáu grave nun accidente de tráficu en Cadavéu

L'afectáu, un varón de 36 años d'edá foi evacuáu pol equipu médicu de la UVI-móvil de Xarrio al Hospital San Agustín d'Avilés

0
165

Una persona resultó mancada de considerancia esti llunes nun accidente de tráficu en Cadavéu, nel conceyu de Valdés. Los fechos tuvieron llugar cuando’l vehículu que conducía salióse de la vía y cayó por un desnivel d’ente 5 y 7 metros na carretera N-632, al altor del puntu kilométricu 152, na curva d’El Ribón. L’afectáu, un varón de 36 años d’edá foi evacuáu pol equipu médicu de la UVI-móvil de Xarrio al Hospital San Agustín d’Avilés. Por cuenta de más pruebes y hasta nueva valoración médica’l so pronósticu ye reserváu.

El mancáu tuvo que ser escarceláu del interior del turismu por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Valdés. P’aportar hasta l’afectáu los bomberos montaron un polipastu y amás asitiaron una escalera. En baxando hasta’l coche dieron en abrir güecu retirando dambes puertes y asitiáron-y un collarín al conductor del coche al que lliberaron. Darréu, con ayuda de los bomberos, xubió pola escalera hasta la carretera onde-y esperaba l’equipu sanitariu.

El Centru de Coordinación d’Emerxencies del 112 Asturies recibió l’avisu a les 15.58 hores. Na llamada señalaben qu’un vehículu saliérase de la vía, cayera por un desnivel d’unos 5-7 metros, y qu’había un atrapáu. La Sala 112 del SEPA activó a los bomberos del parque valdesanu y pasó l’avisu al SAMU qu’unvió los medios yá citaos. Tamién informó a la Guardia Civil qu’unvió una patrulla a la zona. A les 16.40 hores los bomberos informaron que yá lliberaran al mancáu. En realizando xeres de seguridá, rematada la intervención retiraron para torna a base onde llegaron al as 17.58 hores.