Un varón resultó mancáu tres sufrir una cayida del teyáu d’una construcción, en fundiéndose, na localidá de Villalmarzo, n’El Franco. Según los datos facilitaos pol Serviciu d’Atención Médica Urxente (SAMU) l’afectáu, por cuenta de más pruebes y hasta nueva valoración médica, presenta un pronósticu reserváu.
El Centru de Coordinación d’Emerxencies recibió l’avisu a les 13:17 hores. Na llamada indicóse que fundiera’l teyáu y el propietariu, que taba sobre él, taba atrapáu so los escombros. Nel momentu movilizóse al Grupu de Rescate de Bomberos d’Asturies, a bordu del helicópteru medicalizáu del Serviciu d’Emerxencies del Principáu d’Asturies (SEPA), y a los efectivos de bomberos de Castropol y Valdés, anque nun foi necesaria la intervención de los efectivos valdesanos.
Una vegada nel llugar procedieron al rescate del afectáu y en siendo atendíu la UVI Móvil de la zona treslladólu al Hospital de Xarrio. Darréu empecipióse’l so treslláu al Hospital Universitariu Central d’Asturies (HUCA).
Los efectivos de bomberos dieron por rematada la so intervención a la so llegada a base a les 15:27 hores, nel casu del equipu de rescate, y a les 15:39 hores nel casu de los bomberos con base en Barres.
La sala del 112 del SEPA informó del sucesu a la Guardia Civil y al SAMU qu’activó la UVI Móvil de Xarrio.
