Un mancáu nun accidente de tráficu en Salas

0
605

Una persona resultó mancada de considerancia en saliéndose de la vía col vehículu que conducía y cayer por un desnivel d’unos 100 metros en Brañasevil, en Salas. El mancáu, un varón de 31 años d’edá, foi evacuáu al Hospital Universitariu Central d’Asturies (HUCA), n’Uviéu, nel helicópteru medicalizáu del SEPA (Serviciu d’Emerxencies del Principáu d’Asturies). Por cuenta de más pruebes y hasta nueva valoración médica presentaba politrauma de pronósticu reserváu.

L’home salió despidíu del vehículu en cayendo unos 100 metros pola turria. El touterrén entornó nun regatu, al fondu d’un prau, 100 metros más abaxo d’onde s’alcontró al afectáu. Foi atendíu nel llugar del accidente pola médica-rescatadora que-y alministró analxesia intravenosa ya inmovilizólu con férula espinal y collarín cervical y amás asitió-y una férula nuna pierna onde se-y diagnosticó quebra de fémur.

L’home foi treslladáu al helicópteru por aciu una operación de grúa na que s’esplegaron 35 metros de cable. El Centru de Coordinación d’Emerxencies recibió l’avisu a les 11.40 h hores. Na llamada, realizada por familiar, señalaben qu’el mesmu afectáu punxérase en contactu para indica-y qu’entornara col touterrén que conducía y tenía una pierna quebrada. Nun taba atrapáu porque saliera despidíu. La Sala 112 del SEPA movilizó l’helicópteru medicalizáu y una dotación de bomberes del parque de Tinéu y paralelamente pasó l’avisu al Serviciu d’Atención Médica Urxente. Amás informóse a la Guardia Civil.