El presidente d’Asturies anunció güei qu’una de les primeres escueles autonómiques pal alumnáu de 0 a 3 años va crease en Muros de Nalón. Mientres la so visita al conceyu, onde se celebró tamién la xunta del Conseyu de Gobiernu, Barbón precisó qu’a finales de 2024 van tar en marcha los dos primeres unidaes del nuevu centru de primer ciclu d’Educación Infantil.
Tamién recordó que si s’aprueben los presupuestos pa 2024, la rede va ser gratuita en toa Asturies, tantu les escueles municipales yá en marcha y les de nueva creación como les autonómiques que se van empezar a constituyir el próximu añu. “Siguimos dando pasos pa estender la rede y facela pública, universal y gratuita”, señaló’l xefe del Executivu.
La rede autonómica d’escueles de 0 a 3 años va empezar a funcionar en setiembre de 2024 y va desenvolvese en cuatro fases. La postrera va suponer l’asunción completa de tolos centros a finales de la llexislatura.
La Conseyería d’Educación va habilitar el próximu añu escueles d’Infantil en conceyos con llistes d’espera o qu’entá nun dispongan d’esti ciclu educativu y que tengan espaciu disponible en colexos públicos, con especial atención a la zona rural. Esta midida va dexar que l’alumnáu pueda escolarizase nun mesmu centru hasta los 12 años.
Educación envalora qu’en 2024 van poder abrir aprosimao 15 escueles en colexos públicos, con hasta 30 unidaes.
