El Gobiernu d’Asturies impulsa un ambiciosu proyectu de restauración y rehabilitación del palaciu de Mon, una xoya arquitectónica de Samartín d’Ozcos, pa tresformala nun equipamientu turísticu y cultural de referencia. Con una inversión total de 1,4 millones procedentes de fondos europeos Next Generation, esta iniciativa pretende combinar el caltenimientu del patrimoniu históricu cola incorporación de nuevos usos que contribuyan a la dinamización económica y social de la contorna de Los Ozcos y del occidente d’Asturies.
“El palaciu de Mon ye un testimoniu vivu de la nuesa hestoria ya identidá. La so restauración non solo va dexar caltener el so valor arquitectónicu, sinón convertilo nun motor cultural y turísticu pa los Ozcos y p’Asturies”, destacó la vicepresidenta, Gimena Llamedo.
El proyectu, lideráu pola Conseyería de Presidencia, Retu Demográficu, Igualdá y Turismu, tien como principal oxetivu revalorizar un edificiu catalogáu como bien d’interés cultural (BIC). El palaciu, que la so historia abarca dende los sos oríxenes como casa-torre medieval hasta la so configuración actual, tien elementos de l’arquitectura medieval, barroca y otres influencies posteriores.
El plan d’obra, que tien un plan d’execución de dolce meses, inclúi les siguientes actuaciones:
- Llimpieza y afitamientu estructural: desbroce de la contorna, llimpieza de fachaes y cubiertes, y refuerzu de les torres, n’especial, de la del sureste, que ye la que s’atopa en peor estáu de caltenimientu.
- Restauración d’interiores y esteriores: rehabilitación de fachaes, techos, chimenees y rexería, lo mesmo que de pavimentos y elementos de madera orixinal.
- Modernización de les instalaciones: incorporación de sistemes de lletricidá, fontanería, calefacción y lluz afechos a les necesidaes actuales.
- Nuevos usos funcionales: van habilitase espacios p’actividaes culturales y turístiques, como una cocina-office, aseos y árees funcionales, calteniendo la esencia histórica del edificiu.
El proyectu diseñóse en collaboración con espertos n’hestoria y arqueoloxía, como l’historiador José Antonio Álvarez Castrillón y l’arqueólogu Elías Carrocera Fernández. Los sos estudios fueron fundamentales pa entender la evolución del edificiu y garantizar que la intervención respete’l so calter orixinal.
El siguimientu arqueolóxicu va ser una parte esencial de les obres, col usu de técniques como la dendrocronoloxía p’analizar les maderes orixinales y determinar les distintes etapes de construcción del palaciu. Amás, al concluyir la intervención, va redactase un informe históricu-arquitectónicu que documentará los afayos y técniques emplegaes.
Un patrimoniu con hestoria y futuru
El palaciu de Mon ye un símbolu de la hestoria de los Ozcos y un exemplu representativu de la evolución de les viviendes señoriales n’Asturies. La so peculiar organización arquitectónica, qu’inclúi dos patios principales (norte y sur), torres medievales y una capiya con característiques úniques, reflexa los cambeos social y económicu a lo llargo de los sieglos.
La restauración tamién busca dar un nuevu protagonismu a la contorna cultural y turística, promoviendo actividaes qu’atraigan tanto a la población local como a visitantes d’otres comunidaes y países.
El Gobiernu d’Asturies va convertir la xoya arquitectónica de Samartín d’Ozcos nun complexu multidisciplinar, nel que va ufiertar formación y actividaes venceyaes a la gastronomía y a los oficios tradicionales. “El nuesu oxetivu ye recuperar nesti espaciu recetes y oficios en peligru d’estinción, mesmo que producciones agroalimentaries escaecíes, y ufiertar formación de cocina tradicional pa nuevos profesionales que s’incorporen a la hostelería”, esplicó la vicepresidenta.