La Vuelta Femenina by Carrefour.es decidióse ayeri en tierres asturianes, poniend’l ramu a una selmana enllena de ciclismu femenín per tol territoriu penínsular, onde se pudieron ver grandes exhibiciones.
La xornada d’ayeri yera’l principiu de la fin d’esta primer edición que remataba con una séptima etapa íntegramente asturiana. Una etapa de 94 quilómetros que salió dende La Pola Siero hasta llegar a la cima de los Llagos de Cuadonga, non ensin antes percorrer Nava, L’Infiestu, la cota de Colláu Moandi y Cangues d’Onís.
La batalla taba yá anunciada dende un primer momentu: Van Vleuten y Demi Vollering, separtaes por 1:11, diben xugase nes carreteres tan pindies de la mítica xubida de Cuadonga, con tramos tan duros como la Güesera. Asina, les dos ciclistes con orixe nos Países Baxos llegaron a la Basílica con un grupu pequeñu que diba dir perdiendo participantes según fueron pasando los quilómetros.
Foi a 6 quilómetros pa rematar la etapa cuando la corredora del movistar, Annemiek Van Vleuten, amosó debilidá énte la so compatriota, Vollering, qu’atacó tres ver esta situación. Un final d’etapa de tensión y bien emocionante, onde Demi Vollering diba ganar la etapa y quedase a namás 9 segundos de ser la vencedora de La Vuelta Femenina by Carrefour.es.
D’esta mena, Annemiek Van Vleuten consigue la so tercer Vuelta a España consecutiva, primer victoria del añu tres algamar una fazaña hestórica na pasa campaña, ganando Giro, Tour, Vuelta y el campeonatu del mundu. Una ciclista d’época que, con 40 años, va colgar la bicicleta a la fin d’esta temporada. Pero entá queda por esfrutar d’ella nes siguientes competiciones.
