El Conseyu de Gobiernu alcordó esti miércoles conceder anguaño dos Medayes d’Asturies na so categoría d’oru a Vicente Álvarez Areces –a títulu póstumu- y a la Brigada Central de Salvamentu Mineru. Amás, concédense otres tres distinciones, na categoría de plata, a la presidenta del Centru Cimeru d’Investigaciones Científiques (CSIC), Rosa Menéndez, a la escultora María Jesús Rodríguez, y a la Rede de Cases d’Acoyida del Principáu. Estos gallardones reconocen méritos verdaderamente singulares de persones o instituciones trescendentes pa los intereses xenerales de la comunidá.
La Medaya d’Oru a Vicente Alberto Álvarez Areces, fináu’l pasáu 17 de xineru, reconoz «el so compromisu cola llibertá y la democracia, la so impecable trayectoria política y la so fundamental aportación para’l desenvolvimientu y la modernización d’Asturies». Nacíu en Xixón el 4 d’agostu de 1943, yera llicenciáu en Matemátiques y peritu industrial. Mientres la so mocedá compaxinó la docencia cola política y participó viviegamente en distintos movimientos estudiantiles. Venceyáu primeramente al Partíu Comunista d’España (PCE), abandonó la formación en 1978. Darréu xunióse al PSOE, al que consagró la mayor parte de la so trayectoria política.
Foi alcalde de Xixón ente 1987 y 1999 y presidente d’Asturies mientres tres llexislatures
Foi escoyíu alcalde de Xixón nos comicios de 1987, 1991 y 1995. Mientres los sos dolce años de mandatu propúnxose modernizar la ciudá, abrir al mar cola creación de les sableres de Poniente y L’Arbeyal, impulsar el so desenvolvimientu urbanísticu, fomentar l’actividá cultural, recuperar l’antiguu puertu y reformar numberosos enclaves como’l cuetu de Santo Catalina, los parques del Rinconín y La Providencia o la sienda del Cervigón.
Tres la so etapa municipal, el 20 de xunetu de 1999 foi investido presidente del Principáu, cargu qu’ocupó hasta 2011. Mientres les sos trés llexislatures la comunidá recibió’l trespasu de les competencies n’Educación, Sanidá y Xusticia. Amás, encetáronse proyectos como’l desenvolvimientu de los campus d’Uviéu, Xixón y Mieres; la construcción del nuevu Hospital Universitariu Central d’Asturies (HUCA), n’Uviéu, y del Vital Álvarez Buylla, en Mieres; l’ampliación del Muséu del Belles Artes y del puertu d’El Musel, la creación del Centru Niemeyer n’Avilés y la puesta en marcha de Llaboral Ciudá de la Cultura en Xixón. So la so presidencia inauguráronse tamién el Muséu del Xurásicu (Colunga), el centru d’interpretación de Pedrete Bustillo (Ribesella) y el Parador de Corias (Cangas), ente otros equipamientos.
