Esti vienres entama na Facultá de Lletres de la Universidade do Porto l’alcuentru «Porto Meeting. Wikimedia minority languages meeting», nel que van tener presencia dellos espertos en llingües minorizaes y persones implicaes nel desendolque de les diferentes wikipedies en cada idioma.
El programa inclúi a representantes d’otres llingües minorizaes y la fin de selmana va centrase nel estudiu y reflexón sobre la situación de les distintes wikipedies en llingües peninsulares. Van tar representantes de les wikipedies catalana, gallega, vasca y asturiana, ente otres.
Pola Wikipedia n’asturianu va tar presente’l maestru d’asturianu y wikipedista Víctor Suárez, que va esplicar la situación que vive anguaño la wikipedia n’asturianu, que ta nunos niveles bien altos de participación y entraes dientro del ranking de llingües con Wikipedia, y magar la falta d’oficialidá del idioma.
Pela parte asturiana, el vienres a les 19:20 hores, va tar tamién el doctor y miembru de l’Academia de la Llingua Asturiana, Inaciu Galán, que va dar una conferencia titulada «L’asturianu, una llingua caminando hacia la oficialidá». La conferencia, abierta al públicu xeneral, va facer un percorríu rápidu pela hestoria y les circunstancies actuales del asturianu.
