El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, anunció güei que’l Boletín Oficial del Principáu d’Asturies (BOPA) va publicar los próximos díes la convocatoria pa resolver la xerencia de Vipasa y que’l procesu de selección va desenvolver en febreru, “polo que Vipasa va tener un nuevu o una nueva xerente nos primeros díes del mes de marzu”.
Asina lo adelantró esta mañana n’una rueda de prensa na que tuvo acompañáu pol director xeneral de Vivienda, Daniel Sánchez, y na qu’avanzó les principales midíes a desenvolver nesti departamentu “en realizando un diagnósticu de la situación” y que s’enmarquen nel xiru de 180 graos qu’anunció na política de vivienda del Principáu mientres la so comparecencia inicial énte la Xunta Xeneral.
Zapico esplicó que la nueva xerencia va tener como prioridá la recuperación del departamentu social de Vipasa “qu’esistió nel so día y que s’esanició por una decisión política y que consideramos una figura perimportante porque nun podemos escaecer cuál ye la situación social d’una gran parte de los nuesos inquilinos”. Dende esti departamentu, esplicó, va aplicase un sistema d’alerta temprano “que detecte impagos y acumuladures importantes de delda porque queremos protexer a esos inquilinos o inquilines qu’atropen deldes d’hasta 10.000 euros, magar que al mes tienen que pagar rentes inferiores a los cien euros, y eso derivaba en desahucios; hai qu’intervenir con antelación pa evitalo”.
Otra cuestión a encetar “de forma inmediata” va ser la ellaboración, frutu de la collaboración ente esi nuevu departamentu social y l’área xurídica de Vipasa, d’un protocolu pa la convivencia y el caltenimientu de la vivienda pública que “garantice un marcu de convivencia que dexe a los inquilinos vivir en pisos públicos con arguyu y ensin estigmes”.
Zapico apostó pola collaboración tamién con otres alministraciones p’atayar esti tipu de problemátiques y punxo como exemplu la recién xunta caltenida cola Delegación del Gobiernu y el Conceyu d’Uviéu p’arreglar los actos vandálicos que se rexistren en dellos bloques de viviendes en Anieves (Uviéu).
