Dir al conteníu
Xixón 2 min de llectura

VOX presiona a Xixón al Día pa intentar retirar una información sobre l’aforu real del so mitin

El periódicu denuncia les presiones del partíu d’ultraderecha tres la publicación d’una noticia que contrastaba l’aforu del Gijón Arena cola capacidá de la plaza de toros d’El Bibio

Por Xixón al Día
CompartirWhatsappBlueskyFacebook

La publicación d’una información periodística que cuestionaba l’afirmación de VOX sobre un supuestu llenazu de la plaza de toros de Xixón provocó les presiones del partíu d’ultraderecha pa intentar que Xixón al Día retirase la noticia. El periódicu considera que lo asocedío supón un intentu de condicionar el trabayu de los medios de comunicación y d’interferir nel derechu a informar y na llibertá editorial.

La noticia publicada esti vienres, titulada «VOX nun llenó la plaza toros de Xixón, sinón una carpa interior 17 veces más pequeña», contrastaba les afirmaciones difundíes pola formación política sobre l’asistencia al actu celebráu na ciudá cola capacidá real del espaciu onde tuvo llugar. L’artículu esplicaba que l’eventu nun se celebró na plaza de toros abierta, que supera les 15.000 places, sinón nel Gijón Arena, una instalación interior con un aforu de 1.000 persones sentaes.

La información nun negaba la asistencia de públicu al mitin, nin cuestionaba que la convocatoria tuviera una presencia importante de simpatizantes. Lo que ponía en cuestión yera la utilización de la imaxe y el nome de la plaza de toros pa tresmitir una dimensión del eventu que nun correspondía col espaciu realmente ocupáu.

Xixón al Día defiende la independencia editorial y el derechu a publicar informaciones contrastaes, tamién cuando estes resulten incómodes pa los responsables políticos, les organizaciones o los poderes económicos. La función del periodismu nun ye reproducir los mensaxes de los partíos nin adaptar la información a los intereses de quien protagoniza l’actualidá, sinón contrastar los datos, contestualizalos y ponelos a disposición de la ciudadanía.

Rellacionao