El pasáu sábadu 18 el Teatru Nuevu de La Felguera acoyó una vegada más a Xabier Díaz. El músicu gallegu acompañáu poles cantantes y percusionistas d’Adufeiras de Salitre, con quienes vien desendolcando dende 2015 esti proyectu de música tradicional, abrió’l conciertu col cantar Primeiro. Amás d’interpretar temes del so más reciente album, As catedrais silenciadas, fixo un repasu a la so discografía nesti proyectu con cantares como La niña de la Arena, Mazurcas de Noró o Pasodoble de Beo. 

Pudo esfrutase amás, del talentu de las Adufeiras de Salitre en solitariu con cantares como Tentenublo, que crearon una atmósfera casi ritual nel teatru Llangreanu. Nun foi esto lo único máxico de la nueche, pues tamién hubo tiempu pa la música asturiana con una riestra de convidaos y convidaes d’escepción. Xubiéronse a les tables Xuan Nel Espósito, Ambás y Ramsés, Marta Elola, Marisa Valle Roso y el grupu Algaire, qu’emocionaron y hasta fixeron baillar al públicu.

Los asistentes rindiéronse a la maestría de Xabier Díaz cola pandereta y el panderu y remataron el recital cantando a coru O baile de Noró, postreru tema de la velada.