Xixón activó güei, martes 11 d’ochobre, el nivel 0 del Protocolu d’actuación n’episodios de contaminación del aire na zona oeste de Xixón énte los datos rexistraos nes estaciones de midida por cuenta de un episodiu d’asoria.
En concretu, la estación denominada Arxentina superó mientres los postreros cuatro díes los estragales de concentración de partícules PM10 establecíos nel protocolu. Coles mesmes, la estación d’El Lloredal rexistró ayeri valores elevaos de PM10 y de PM 2’5.
El Protocolu, aprobáu pola Xunta de Gobiernu’l 2 de payares de 2021, establez la implementación d’una serie de midíes en materia de control calidable del aire mientres la so activación empobinaes a amenorgar les emisiones contaminantes y a protexer la salú pública.
Nel nivel 0 preventivu contempla, ente otres midíes, el riego de carreteres y la vixilancia de la circulación de vehículos pesaos que tresporten graneles sólidos pulverulentos na zona d’activación del protocolu con cuenta de comprobar la so llimpieza y la disposición de sistemes d’entoldáu y caxes hermétiques. Amás, prohíbese les quemes de restos vexetales en suelos non urbanos y va avisar a les empreses allugaes na zona y qu’operen so una autorización ambiental integrada (AAI) o autorización como actividá potencialmente contaminadora de l’atmósfera (APCA) por qu’adopten midíes d’amenorgamientu d’emisiones (les que con calter xeneral establez el Protocolu y les qu’específicamente concrete la so autorización ambiental). Tamién se recueye la necesidá d’estremar los precuros nos procesos industriales susceptibles de xenerar emisiones difuses, incluyida la manipulación y almacenamientu de graneles, nel marcu de les sos autorizaciones ambientales.
El protocolu va permanecer activu hasta que s’amenorguen los niveles de partícules contaminantes.
