El circuitu nacional d’ocho pruebes de la Carrera de la Muyer Central Llechera Asturiana conclúi esti domingu cola celebración a partir de les 10AM de la tradicional prueba de Xixón que va rexuntar a un total de 3.500 muyeres. Va ser el broche d’oru al «añu de la torna” al asfaltu y a les carreres físiques de la Marea Rosa, el color de les camisetes Oysho que llucen les participantes. La cita asturiana retrasóse del pasáu mes de setiembre a esti 12 d’avientu pa faer posible un meyor escenariu y un mayor cupu de corredores por cuenta de la crisis sanitaria aniciada pol Coronavirus.
Anque va ser una edición ensin actividaes paraleles y una menor participación que nes d’antes de la pandemia, precisamente pa garantizar les midíes sanitaries frente al Covid-19 con salíes por folada de 600 corredores, la Carrera de la Muyer Central Llechera Asturiana de Xixón volverá conquistar les cais de Xixón pa llanzar el so mensaxe d’ánimu y llucha contra’l cáncer de mama, pa siguir fomentando la práctica deportiva ente les muyeres de toles edaes, y sofitar con tola so fuerza los distintos proyectos solidarios y reivindicativos del papel de la muyer en tolos ámbitos sociales.
La ex maratoniana Rocío Ríos (quinta nos Xuegos Olímpicos de Atlanta en 1996) va recibir un emotivu homenaxe de tola Marea Rosa na salida’l domingu como reconocencia a la so trayectoria y por ser un gran exemplu pa toles muyeres deportistes, pol so compromisu, esfuerzu y dedicación.
El percorríu de 5,5 kilómetros caltiense como na anterior edición, con salida na Avenida Albert Einstein y meta na recta del Hipódromu del complexu polideportivu de Les Mestes.
Anque la Expo de la Corredora celébrase tamién de forma física esti sábadu, y onde les participantes van poder recoyer la camiseta oficial Oysho de la Marea Rosa y la bolsa de la corredora que se va apurrir de 10 a 20 hores nel Módulu d’Atletismu de les Mestes, al llau de les pistes, la Carrera de la Muyer Central Llechera Asturiana facilitó la unviada de la bolsa de la corredora y la camiseta oficial a casa. De forma paralela, podrá correse de manera individual y dende cualquier sitiu la Carrera Virtual usando la app oficial del eventu.
La Marea Rosa va caltener l’espíritu solidariu de les ediciones anteriores y va realizase una donación a final del circuitu a l’Asociación Española Contra’l Cáncer y va siguise sofitando económicamente a trés fundaciones centraes en protexer a les muyeres en distintos ámbitos: Wanawake Muyer, Pulseres Roses y Clara Campoamor. Amás, en Xixón punxéronse a la vienta 50 dosales 100% solidarios a favor de la fundación asturiana El Páxaru Azul. Amás la Z Zurich Foundation va apurrir el 50% de les donaciones de la Marea Rosa a los proyectos solidarios de la Carrera de la Muyer, polo que caúna de les aportaciones en Xixón van vese inda más compensaes.
Coles mesmes, la Carrera de la Muyer caltien el so proyectu de merchandising social MásQueUnaMuñeca cola vienta de 11 modelos de muñeques en forma de pin a 3,5 euros, ellaboraos a mano por muyeres en riesgu d’esclusión social y supervivientes de trata d’esplotación sexual y llaboral, según los calcetos y calcomaníes de Wanawake Muyer y del Banco Santander.
Ente los oxetivos prioritarios caltiense l’esfuerzu por incorporar a les muyeres de toles edaes a la práctica habitual del deporte, lluchar contra’l cáncer y concenciar sobre la importancia de la prevención, según promover vezos de vida saludables pa evitalo na midida de lo posible, y combatir la violencia de xéneru y les desigualdaes social y educativu que sufren les muyeres.
Toles muyeres van llucir el 016 nos sos dosales nes carreres físiques, que ye’l teléfonu d’atención a les víctimes de violencia machista y que nun dexa buelga na factura telefónica.
La Carrera de la Muyer Central Llechera Asturiana 2021 va cuntar col patrociniu principal de Central Llechera Asturiana, Oysho, Zurich Seguros y Banco Santander, el sofitu de Michelin, TotalEnergies, Ladival, Marlene y Solán de Cabres, y la collaboración del Conceyu de Xixón.
