Dende güei y hasta esti sábadu, día 25, Xixón va convertise por primer vegada nel llugar d’alcuentru d’estes xornaes estatales, celebraes cola collaboración del Conceyu de Xixón y l’Universidá Nacional d’Educación a Distancia (UNED).
Según la directora xeneral de Memoria Democrática, Begoña Collado Villa, l’oxetivu ye aldericar y reflexonar sobre les atrocidaes que vivieron mientres el franquismu los más de 500.000 españoles que se calcula que sufrieron l’esiliu, de los que más de 9.000 fueron deportaos a los campos nazis. Amás, d’ellos, calcúlase qu’unos 50.000 esiliaos veníen de la nuesa comunidá, y qu’esisten alredor de 200 deportaos asturianos. “Lo más murnio ye que, dempués del esiliu, los supervivientes nunca pudieron tornar a les sos cases, porque se-yos consideraba apátrides”, esplica Collado Villa.
Les xornaes empiecen a los diez de la mañana cola presentación per parte de les asociaciones memorialistes organizadores y unes palabres de bienvenida al cargu de la viceconseyera de Derechos Ciudadanos y la conceyala del Conceyu de Xixón Montserrat López Moro. De siguío, va tener llugar un taller de podcast didácticu con estudiantes d’institutos que va ser impartíu pola periodista de la RPA, Patricia Martínez.
Pela tarde, la cita va treslladase al Centru Municipal Integráu d’El Llano que, dende les cinco de la tarde, va acoyer la mesa redonda L’esiliu empieza cola Retirada, al cargu de la Asociación de Descendientes del Esiliu Español; mesmo que les conferencies Llei de Memoria, un esiliu por cada esiliáu, del abogáu Eduardo Ranz Alonso; y Un poeta, una tumba y un buzón de rescate de la memoria, de la historiadora y vicepresidenta de la Fundación Antonio Machado Verónica Sierra Blas.
Poco dempués, a les siete de la tarde, va proyectase’l documental Urraca, cazador de rojos (2023), una película que cunta la hestoria del policía español y axente de la Gestapo que lideró la persecución de republicanos españoles esiliaos en Francia Pedro Urraca. De siguío, va tener llugar un alderique telemáticu con Loreto Urraca Luque, nieta de Pedro Urraca.
El programa va siguir el vienres a los diez na Escuela de Comerciu de Xixón cola mesa redonda Republicanos españoles deportaos a los campos de concentración nazis, dempués de lo que va ser proyectáu’l documental Carretera a Gusen, que cunta’l percorríu de 2.000 quilómetros en bicicleta d’Álex Cirera pa rescatar del olvidu al so güelu, asesináu nel campu nazi de Gusen, n’Austria.
Pela tarde, les xornaes van treslladase de nuevu al Centru Municipal Integráu El Llano, que va acoyer una mesa redonda de les asociaciones memorialistes d’Asturies moderada pola directora Begoña Collado Villa y que la so clausura va correr a cargu del secretariu d’Estáu de Memoria Democrática, Fernando Martínez López. El broche final del día va ponelu un conciertu de la cantautora Sensi Falán, que va interpretar la so última producción, titulada Más allá de la memoria.
L’alcuentru va rematar el sábadu con una visita por distintos llugares de la memoria de Xixón que va entamar na estatua d’Augusto nel Campu Valdés, na sablera de San Llorienzo.
