La ciudá afítase como destín comprometíu cola caltenibilidá acreditáu pola certificación Biosphere Gold Destination.
Xixón Turismo anovó, un añu más, la certificación Biosphere Gold Destination polos esfuercios realizaos en consonancia cola caltenibilidá. La estaya de Turismu de Divertia Xixón recibió la comunicación del Institutu de Turismu Responsable (ITR), entidá venceyada a la Unesco y la Organización Mundial del Turismu (OMT), sobre la renovación de la certificación Biosphere Gold Destination que la ciudá tien de magar l’añu 2013.
Esta certificación básase nel desendolcu continuu esperimentáu pola ciudá, teniendo en cuenta’l so nivel de competitividá, calidá, estremación, autenticidá y el compromisu de tolos axentes del turismu: sector públicu, empreses y servicios, ciudadanía y turistes, too ello en consonancia col cumplimientu de los Oxetivos de Desarrollu Sostenible de les Naciones Xuníes (ODS) y con un horizonte 2030.
Xixón inclúi al so sector empresarial nel procesu y yá tien 27 entidaes que se xunieron a la plataforma Biosphere Sustainable Lifestyle al traviés del compromisu caltenible del destín. Gracies a esta ferramienta pa la xestión de la caltenibilidá, les empreses puen crear un plan de caltenibilidá personalizáu dafechu, amás de tener la oportunidá de compartir y poner en comuña bones práutiques ente elles. Estes 27 empreses yá entamaron actividaes caltenibles en consonancia colos 17 ODS y l’Axenda 2030.
Certificación Biosphere
Dende 2013, Xixón forma parte de Biosphere Destination Community y lleva demostrando cadañu los sos esfuercios y avances nel camín hacia l’ameyoramientu continuo, teniendo presente los principios de xestión caltenible nos ámbitos ambientales, económicos, culturales y sociales pa la toma de decisiones más responsables pa la contorna.
