L’estand de Xixón na Feria de Muestres acoyó esti llunes la presentación del cómic ‘Les 7 maraviyes de Xixón’. Esti trabayu, realizáu por Ruma Barbero col puxu de Xixón Turismu y la collaboración de la Oficina de Normalización Llingüística, amuesa, per aciu de personaxes de la mitoloxía asturiana, los siete recursos turísticos más destacaos na ciudá asturiana: l’Acuariu, les sableres, el parque Isabel La Católica, Llaboral Ciudá de la Cultura, el Xardín Botánicu, l’estadiu d’El Molinón Enrique Castro Quini y Cimavilla.
El trabayu ye parte de les aiciones entamaes por Xixón Turismu de collaboración colos ciudadanos de la ciudá pa implicalos na promoción turística. La idega surdió nel cursu escolar 2017-18, cuando Xixón Turismu trabayó colos escolinos del C.P. Santa Olaya pa escoyer los 7 recursos qu’ellos recomendaríen a los nuesos visitantes más pequeños. D’aquel trabayu surdió un planu infantil con diseños de Ruma Barbero, que s’espublizó n’asturianu y que se reparte nes oficines d’Infoxixón.
Tres la bona acoyida d’esti planu, plantegóse realizar una guía turística en forma de cómic na que se cuenta la hestoria de Trasgu y Serena, dos de los personaxes ideaos por Ruma Barbero, visitando colos sos collacios y collacies los siete recursos. El restu de personaxes son la Guaxa, l’Espumeru, la Xana, el Nuberu, la Busgosa y el Cuélebre. El cómic espublízase n’asturianu, castellán, inglés y francés y va repartise nes oficines d’Infoxixón.
Sobre Ruma Barbero
Ruma Barbero ye llicenciáu en Belles Artes pola Universidá de Salamanca. Tien ganaos premios autonómicos de cómic como: ‘El llapiceru’, ‘Comarca de la Sidra’ y en dos ocasiones el prestixosu ‘Alfonso Iglesias’. Cofundaor de la editorial ‘Cactus Comics’ 1997. Miembru fundaor de los grupos de folk asturianu Felpeyu y Los Ciquitrinos. Lletrista pa grupos como Felpeyu, Los Ciquitrinos, Tejedor, Blima, Pandereteres de Fitoria, Vrienden, ¿Aú? o los proyectos Aire y Bestiariu. Con un Premiu de la Música en 2008. Diseñador y maquetador de llibros y de carátules de discos de: Felpeyu, La Bandina, DRD, Verdasca, Blima, Tuenda, Herr Manos etc. Autor de cartelos teatrales, cinematográficos, de conciertos y festivales de música.
