Xixón al día

Etiqueta: El Molinón

  • Iniciativa pol Asturianu demanda la presencia del asturianu nos paneles nuevos d’El Molinón

    Iniciativa pol Asturianu demanda la presencia del asturianu nos paneles nuevos d’El Molinón

    Iniciativa pol Asturianu presentó una reclamación al Conceyu de Xixón pa que l’asturianu tea presente nes pantalles informatives instalaes recién nos aparcaderos del estadiu municipal El Molinón-Enrique Castro Quini. Los paneles electrónicos nuevos instaláronse hai delles selmanes y yá tan en funcionamientu.

    La organización de reivindicación llingüística llamenta l’ausencia del asturianu nunos elementos nos que la presencia del idioma nun xeneraría costu adicional, sinón que los mensaxes podríen intercalase y apurrise de forma billingüe. Aprovechando l’usu de la electrónica na cartelería, sedría bien interesante la presencia del asturianu pola so visibilidá de les informaciones (díes, hores…).

    Amás, Iniciativa pol Asturianu reclama l’usu de la toponimia oficial nestes pantalles, onde namás ta presente’l topónimu ‘Gijón’. D’esta manera, el Conceyu de Xixón inora la toponimia oficial, que recueye dende setiembre de 2006 la forma tradicional ‘Xixón’.

  • Esti sábadu va celebrase’l I Hackathon d’Emprendimientu Xuvenil d’Asturies n’El Molinón

    Esti sábadu va celebrase’l I Hackathon d’Emprendimientu Xuvenil d’Asturies n’El Molinón

    El sábadu 20 de payares va cellebrase n’el Molinón Enrique Castro «Quini» el I Hackaton d’Emprendimientu Xuvenil d’Asturie. Trátase del remate al proyectu EMPRENDE STEAM, desenvolvíu dende AJE Asturies cola collaboración de la Conseyería de Ciencia, Innovación y Universidá, col que se quixo fomentar la cultura emprendedora y les metodoloxíes STEAM nos neños y neñes de 10 colexos asturianos.

    Mientres cuatro selmanes tuvieron trabayando en dellos talleres y dinámiques, baxo la metodoloxía d’Extraescolaria y Genyus School, nos que trabayaron ente otres xeres ciencia, emprendimientu y habilidaes blandes. Amás, trés empreses reales -Conseyería de Ciencia, bancu Sabadell y la Fundación escuela de fútbol de Maréu- plantegáron-yos retos reales y los neños trabayaron mientres dos selmanes en soluciones innovadores pa estos retos.

    Nesta xornada, los grupos finalistes de cada colexu van presentar les sos soluciones énte los más de 300 asistentes y van recibir feedback de les entidaes promotores de los retos. Van cuntar col sofitu de los sos colexos y families, amás de tar abiertu al públicu en xeneral.

  • Foru denuncia que l’avenida d’El Molinón «lleva un añu paralizada»

    Foru denuncia que l’avenida d’El Molinón «lleva un añu paralizada»

    Foru va solicitar l’espediente de la obra de l’avenida d’El Molinón a Parques y Xardinos. «Nun s’esplica a qué espera l’equipu de gobiernu p’abrir una avenida tan allegada y emblemática de Xixón que pudo tar abierta tres el confinamientu», aseguró’l voceru de la formación Jesús Martínez Salvador. «La obra lleva un añu paralizada y pudo abrir al públicu yá va meses y con una inversión amenorgada. Queremos pescudar por qué’l Gobiernu del PSOE afirma agora que nun hai plazos establecíos», dixo’l conceyal en referencia a una entrevista del conceyal socialista Olmo Ron en La Nueva España na que manifiesta que «cuando haya plazos establecíos, vamos dir informando».

    El voceru de Foru recuerda que dende’l so Grupu Municipal solicitóse’l pasáu mes de xunu que se abrir de forma completa la cera próxima al parque «y desoyeron esta demanda». «La inversión necesaria p’abrir l’avenida d’El Molinón ye de 103.000 euros que nun quixeron acometer; sicasí, nun los importó gastar 250.000 euros nuna actuación provisional que nun gusta a casi naide n’El Muro», llamentó Martínez Salvador. «El branu de 2020 va ser recordáu en Xixón como’l de los atascos. Daqué insólitu teniendo en cuenta que nun hai eventos multitudinarios», alvirtió.

  • Xixón amuesa los sos siete maraviyes

    Xixón amuesa los sos siete maraviyes

    L’estand de Xixón na Feria de Muestres acoyó esti llunes la presentación del cómic ‘Les 7 maraviyes de Xixón’. Esti trabayu, realizáu por Ruma Barbero col puxu de Xixón Turismu y la collaboración de la Oficina de Normalización Llingüística, amuesa, per aciu de personaxes de la mitoloxía asturiana, los siete recursos turísticos más destacaos na ciudá asturiana: l’Acuariu, les sableres, el parque Isabel La Católica, Llaboral Ciudá de la Cultura, el Xardín Botánicu, l’estadiu d’El Molinón Enrique Castro Quini y Cimavilla.

    El trabayu ye parte de les aiciones entamaes por Xixón Turismu de collaboración colos ciudadanos de la ciudá pa implicalos na promoción turística. La idega surdió nel cursu escolar 2017-18, cuando Xixón Turismu trabayó colos escolinos del C.P. Santa Olaya pa escoyer los 7 recursos qu’ellos recomendaríen a los nuesos visitantes más pequeños. D’aquel trabayu surdió un planu infantil con diseños de Ruma Barbero, que s’espublizó n’asturianu y que se reparte nes oficines d’Infoxixón.

    Tres la bona acoyida d’esti planu, plantegóse realizar una guía turística en forma de cómic na que se cuenta la hestoria de Trasgu y Serena, dos de los personaxes ideaos por Ruma Barbero, visitando colos sos collacios y collacies los siete recursos. El restu de personaxes son la Guaxa, l’Espumeru, la Xana, el Nuberu, la Busgosa y el Cuélebre. El cómic espublízase n’asturianu, castellán, inglés y francés y va repartise nes oficines d’Infoxixón.

    Sobre Ruma Barbero

    Ruma Barbero ye llicenciáu en Belles Artes pola Universidá de Salamanca. Tien ganaos premios autonómicos de cómic como: ‘El llapiceru’, ‘Comarca de la Sidra’ y en dos ocasiones el prestixosu ‘Alfonso Iglesias’. Cofundaor de la editorial ‘Cactus Comics’ 1997. Miembru fundaor de los grupos de folk asturianu Felpeyu y Los Ciquitrinos. Lletrista pa grupos como Felpeyu, Los Ciquitrinos, Tejedor, Blima, Pandereteres de Fitoria, Vrienden, ¿Aú? o los proyectos Aire y Bestiariu. Con un Premiu de la Música en 2008. Diseñador y maquetador de llibros y de carátules de discos de: Felpeyu, La Bandina, DRD, Verdasca, Blima, Tuenda, Herr Manos etc. Autor de cartelos teatrales, cinematográficos, de conciertos y festivales de música.

  • El Sporting entama’l caltenimientu d’El Molinón col pintau de les puertes

    El Sporting entama’l caltenimientu d’El Molinón col pintau de les puertes

    El Sporting va empezar les obres de caltenimientu del estadiu d’El Molinón col pintau de les puertes. Ye ún de los alcuerdos algamaos nel conceyu ente l’alcaldesa de Xixón, Ana González, y el conceyal de Deporte, José Ramón Tuero, col presidente y el vicepresidente del club, Javier Fernández y Javier Martínez, respectivamente. Nel alcuentru, falaron ente otres cuestiones, del caltenimientu y del estáu del estadiu.

    Per parte del club informóse al Conceyu de la detección de problemes estructurales nel estadiu, desque la obra foi apurrida pola concesionaria, en 2012. La entidá comprometióse a redactar un informe pa que seya analizáu pol Conceyu y tomar les midíes oportunes. A lo último, el Conceyu treslladó a la directiva del Sporting el so prestu pol cambéu na política de fichaxes, recuperando xugadores de la cantera.

  • José Alberto: «Tenemos que ser más fuertes n’El Molinón»

    José Alberto: «Tenemos que ser más fuertes n’El Molinón»

    José Alberto fixo balance de la temporada desque se fixo cargu del Sporting. Esplicó que non siempres pudo recurrir al sistema de xuegu qu’a él-y gusta, pero qu’apertaba la necesidá de sumar puntos. Destacó l’esfuerzu realizáu y el llastre xeneráu tres el partíu en Tarragona. Asumió que «fuimos irregulares» y non lo suficientemente sólidos en casa. Por eso, pa la próxima temporada señaló que «tenemos que ser más fuertes n’El Molinón«. Considerólo perimportante.

    Amosóse satisfechu del trabayu realizáu énte’l Cádiz polos xugadores del filial, que «tuvieron al so nivel» nun partíu que definió d’ambiente frío». Destacó «l’entamu de xugada que tuvimos, anque nos faltó enriba daqué más de llegada, magar dispunximos de trés o cuatro causes pa marcar».

  • Gragera: «José Alberto confía muncho na cantera»

    Gragera: «José Alberto confía muncho na cantera»

    Anque inda xuvenil, José Gragera desenvolvióse na sala de prensa de Mareo como si d’un veteranu tratárase. «Atópome bien cómodu entrenando col primer equipu, ponénmelo fácil, ye un gran grupu», señaló’l mediocampista, que «considera qu’ameyoró dende entós» no personal. Reconoz que’l ritmu de xuegu ye distintu al respective d’otres categoríes, «va más rápidu’l balón». L’anterior xornada vio’l partíu dende’l banquín. Asegura que nun s’encegola cola posibilidá de debutar. Namá piensa «en trabayar», anque reconoz que faelo ye «un suañu pa tou canteranu», magar asume que «hai más xugadores nel equipu».

    El Sporting ye daqué bien importante pa él: «Voi a El Molinón desque tengo trés años; para la mio familia ye daqué bien importante». Foi’l so padre’l que lu introdució y col que lleva viviendo tolos tramos de la so vida futbolística. Gústa-y falar y aldericar con él. Anueche vio’l partíu del Cádiz con él: «Afitámonos especialmente nos mediocampistes».

    Esplicó que «José Alberto confía na cantera». Fíxo-y debutar nel filial y podría facelo bien lluéu col primer equipu. Naide-y dixo nada inda sobre la pretemporada: «Nun sé nada, pero reconozo que me gustaría facela col primer equipu». Vivió un gran añu, convocáu pola Selección Española Sub19, habitual nel filial, entrenándose nel tramu final lligueru col primer equipu… Sicasí, l’anterior tamién-y paeció bien bona, cuando «llegamos a la final de la Copa de Campeones (xuveniles)».

    Gragera espunxo que nun-y resultaba fácil definise como mediocampista, anque se considera «un xugador d’equipu al que-y gusta trabayar en comuña». Afitar en Busquets y en Parejo y tocantes a xugadores que vio xugar nel Sporting, citó a Sergio Álvarez y a Rivera.

  • La Mareona tien un nuevu miembru

    La Mareona tien un nuevu miembru

    La familia del Sporting sigue medrando. El pasáu 5 de mayu nel Hospital de Cabueñes nació Izan García Meana, qu’abandera una nueva xeneración de sportinguistes. El nuevu miembru de la Mareona vieno a la vida col so carné de sociu del club sol brazu, amosando asina dende’l primer minutu la so fidelidá a los colores coloráu y blancu. La culpa d’ello ye del so padre, Martín García, qu’allegó rápido a les oficines del club pa saca-y el carné. L’estadiu d’El Molinón – Enrique Castro ‘Quini’ espera yá la primer visita del más nuevu de los aficionaos sportinguistes.

  • José Alberto: «Trátase de quedar lo más arriba posible»

    José Alberto: «Trátase de quedar lo más arriba posible»

    «Trátase de quedar lo más arriba posible na clasificación y de facelo tamién coles meyores sensaciones». Asina encara José Alberto‘l partíu d’esti sábadu énte l’Albacete, un equipu del que destaca’l so «potencial nes dos árees y la so pegada, amás de que nun precisa tener muncha posesión». L’entrenador del Sporting quier la victoria «por nós mesmos, pola nuesa afición y polos rivales que tán en competición», por una evidente cuestión d’integridá.

    Na so comparecencia énte los medios de comunicación, José Alberto refugó falar del futuru más allá d’esta temporada, del presente, anque reconoció sentir «l’enfotu del club». Preguntáron-y pol llunar que vio esta campaña: «El nuesu debe de la temporada foi nun poder consiguir qu’El Molinón se convirtiera nun fortín».

    Preguntáu pola afición, l’entrenador del Sporting amosóse bien estimosu. Siente que-y tresmite ilusión. Tocantes a la posibilidá de que pueda vese esti sábadu un centru del campu íntegramente de Mareo, respondió que «too ye posible».

  • Ana González: “El carné del Real Oviedo col mio nome ye falsu”

    Ana González: “El carné del Real Oviedo col mio nome ye falsu”

    La candidata del PSOE a l’Alcaldía de Xixón, Ana González, aseguró esti martes que nunca foi socia del Real Oviedo, y que’l carné que se distribuyó peles redes sociales la fin de selmana del derbi asturianu “solo buscaba desacreditame”. González realizó estes declaraciones enantes de la visita a les instalaciones del Muséu del Real Sporting nel estadiu d’El Molinón, “claru iconu de la ciudá”.

    La candidata socialista aseguró que too respondió a una artimaña política “pa intentar faeme dañu” y que nunca foi socia de nengún equipu porque “nun soi futbolera”. González dixo saber d’ónde salió esa falsificación y bromió cola torpeza” de quien fixo esi carné, expedíu supuestamente nun añu nel que’l Real Oviedo cuntaba con más de 12.000 socios y “a mi axudicáronme’l 5.615”.

    González llamentó que “persones que recurren a estos métodos, como mentir y falsificar, pretendan tener dalguna opción dientro d’una institución pública”. Per otra parte, aseguró que la relación ente’l Sporting y la ciudá ye absoluta y ye bien importante tar col equipu yá que forma parte de la marca Xixón”.