L’Ayuntamientu de Xixón empecipia n’abril dos Escueles Taller pa 60 mozos desemplegaos d’ente 16 y 30 años. Son proyectos d’empléu y formación dirixíos a facilitar l’accesu al mercáu llaboral al traviés del aprendizaxe y l’esperiencia profesional.
Combinen la cualificación pal llogru d’un certificáu de profesionalidá de niveles 1 a 3 cola realización d’una obra o serviciu real d’interés públicu. Tienen una duración total de 18 meses; los trés primeros meses tán empobinaos a la formación con una beca d’asistencia de 9 euros al día; mientres los 15 meses restantes, l’alumnáu va tener un contratu pa la formación n’alternanza pol que va percibir el 75% del Salariu Mínimu Interprofesional.
En total, estes dos Escueles Taller cunten con 929.798’34 euros de financiamientu pa cubrir los costos salariales de les persones participantes.
Unu de los programes ye’l denomináu ‘La Casina’, que va cuntar con 4 fases y un total de 24 places pal desenvolvimientu d’especialidaes rellacionaes con actividaes auxiliares en viveros, xardinos y centros de xardinería; cola instalación y caltenimientu de xardinos y zones verdes; con trabayos de carpintería y mueble y l’instalación d’elementos de carpintería; y con operaciones auxiliares d’albañilería de fábriques y cubiertes y fábriques d’albañilería. Dispon d’una subvención total de 688.740 euros.
La otra Escuela Taller corresponder col proyectu ‘Xixón acompaña’, tamién estremáu en cuatro fases pa un total de 36 alumnes y alumnos. Estructúrase en módulos de formación n’atención sociosanitaria a persones na casa y a persones dependientes n’instituciones sociales; en dinamización d’actividaes de tiempu llibre educativu infantil y xuvenil; na confección y publicación de página web, al desenvolvimientu d’aplicaciones con tecnología web, n’operaciones auxiliares de servicios alministrativos y xenerales y a operaciones de grabación y tratamientu de datos y documentos. El presupuestu total pa la so execución cífrase en 1.033.110 euros.
