Xixón, capital del yudu mozu nacional

Los meyores yudoques españoles de la categoría júnior van dase cita na octava Copa d'España

0
80

Xixón va ser esta fin de selmana la capital del yudu nacional. Los meyores yudoques españoles de la categoría júnior van dase cita na octava Copa d’España. La prueba algama la so octava edición, y failo con más de 300 yudoques procedentes de toles comunidaes autónomes. Nesta ocasión destaca la gran participación femenina con más d’un centenar de muyeres sobro los distintos tatamis que se van habilitar nel pabellón de L’Arena.

La participación asturiana va ser alta, como nun puede ser d’otra forma, con representantes de la práctica totalidá de los clubes de la Federación Asturiana de Yudu. La participación internacional llega anguaño de yudoques procedentes d’Andorra, Portugal y Estaos Xuníos.

La competición, afitada pal sábadu 9 de payares, va empezar a les 9.30 de la mañana. La delegación de la Federación Española llega’l vienres pela tarde, encabezada por José Ángel Fierro. El presidente de la Federación Aragonesa va exercer de presidente del Comité Director. Raúl Camacho va ser l’encargáu arbitral, dándose la circunstancia de que ye l’árbitru internacional español que tien más posibilidaes d’allegar a los próximos Xuegos Olímpicos de Tokio 2020. Como novedá importante, Jesús Alzíbar, seleccionador nacional cadete y miembru de la comisión informática, va encarar el retu de que la competición na so integridá pueda siguise por emisión en directu vía canal de YouTube de la Federación Española de Yudu.