El Conceyu de Xixón constituyó esta tarde’l Conseyu Sectorial de Cultura, nuna primer sesión que se celebró nel Centru de Cultura Antiguu Institutu y que tuvo presidida pola alcaldesa, Ana González Rodríguez.
L’oxetivu d’esti nuevu conseyu ye enriar la participación ciudadana y da-y a la cultura un valor estratéxicu de ciudá. Por ello, naz col propósitu d’afondar na relación ente la ciudadanía y les polítiques culturales que se desenvuelven nel conceyu, dientro d’un espaciu de relación y diálogu nel que tán representaes les persones responsables de la xestión cultural municipal, y tamién de los distintos sectores culturales.
El Conseyu Sectorial de Cultura, d’ámbitu municipal, va informar y va asesorar al Conceyu sobro toes aquelles cuestiones relatives al so ámbitu d’actuación y competencies. Tien, por tanto, calter consultivu, potenciando l’intercambiu d’esperiencies, información, alderique, siguimientu y evaluación de les polítiques culturales.
Coles mesmes, va impulsar la realización d’estudios o investigaciones en materia de cultura y va poder constituyir les comisiones de trabayu que s’envaloren convenientes pa temes concretes.
L’Alcaldía va tener la presidencia d’esti órganu, que va poder delegar nes conceyalíes del Gobiernu municipal, y va tar integráu por un total de 24 persones, a sumar a la presidencia. Asina, van participar nesti conseyu, la persona titular de la Conceyalía de Cultura; la dirección de la Fundación Municipal de Cultura, Educación y Universidá Popular; la xerencia de Divertia; la xerencia de Xixón Impulsa; un miembru de caún de los grupos municipales con representación nel Plenu del Conceyu; la Federación d’Asociaciones de Vecinos de la Zona Urbana; la Federación d’Asociaciones de Vecinos de la Zona Rural; la Conseyería de Cultura; cinco persones en representación de les asociaciones legalmente constituyíes ya inscrites nel Rexistru Municipal d’Asociaciones de Xixón y que, según los sos estatutos, recueyan ente los sos fines el diseñu y ellaboración de propuestes culturales; y seis persones en representación d’entidaes o colectivos qu’apiguren a profesionales de los distintos subsectores culturales: música, artes escéniques, artes plástiques y artes gráfiques, llibros y lliteratura, audiovisuales, patrimoniu cultural material ya inmaterial.
