El Conceyu de Xixón, al traviés de l’Axencia Local de Promoción d’Empléu, va participar nel foru ‘Observatorios del mercáu de trabayu’ como exemplu de bones práctiques al pie de Madrid y Barcelona.
Tratase de les xornaes ‘Reparamos en Rede. Empobinando la formación’, entamaes dende’l Serviciu Públicu d’Empléu Estatal pol Ministeriu de Trabayu y Economía Social, que se van celebrar el 29 y el 30 de marzu n’Albacete.
Xixón va presentar la ferramienta dixital innovadora ‘Gijón en cifras’ dientro del taller ‘Detección de necesidades formativas en el ámbito local’ nel que van participar tamién les otres dos grandes ciudaes. Tratase d’una ferramienta apocayá incorporada a la xestión municipal coles mires d’ameyorar la conocencia pa tomar de decisiones na programación y desenvolvimientu de les polítiques actives d’empléu. Tal que señaló’l director xeneral d’Empléu del Conceyu y encargáu de la ponencia, David Rionda, dexa realizar un analís homoxéneo y actualizao de los datos locales con 20 indicadores socioeconómicos, nueve indicadores de contratación y paru según 34 gráficos y 19 mapes. Coles mesmes, indicó, respuende a criterios de tresparencia y eficiencia, una y bones l’accesu a esti recursu ye llibre, y al compromisu de meyora de la empleabilidá.
Nes Xornaes van tar presentes, amás, los observatorios del SEPE, comunidaes autónomes, organismos sectoriales, interlocutores sociales y entidaes de referencia na materia. La finalidá de les mesmes ye intercambiar métodos, esperiencies y bones práctiques para una meyor conocencia de la realidá y los tresformamientos qu’esperimenta’l mercáu de trabayu, y de les competencies y capacidaes profesionales que rique.
Per otru llau, va texese una rede d’intercambiu d’información y procesos de digitalización na orientación, formación y empléu ente’l Serviciu d’Empléu del Principáu d’Asturies (SEPEPA), el Serviciu d’Empléu Estatal (SEPE) y el Conceyu de Xixón nun marcu de cooperación ente alministraciones.
