Xixón representa la vanguardia de les práutiques de turismu intelixente nos destinos turísticos europeos. Asina lo considera la Comisión Europea, qu’incluyó a la ciudá asturiana ente los siete finalistes del certame Capital Europea del Turismu Intelixente 2023.
La Capitalidá Europea de Turismu Intelixente ye una forma de premiar a les ciudaes europees con práutiques turístiques destacaes, anovadores y sostenibles y busca fortalecer el desendolcu anovador xenerao pol turismu nes ciudaes europees y la so redolada, aumentar la so prestancia y fortalecer el medru económicu y la creación d’emplegu.
L’alcaldesa de Xixón, Ana González, y el direutor de Visita Xixón, Daniel Martínez Junquera, van aportar el 9 de payares viniente a Bruxeles pa defender la candidatura y demostrar les práutiques turístiques anovadores de Xixón nes estayes d’accesibilidá, sostenibilidá, dixitalización, padremoñu cultural y creatividá. Ta previsto que’l xuráu faiga públiques les dos Capitales Europees del Turismu Intelixente de 2023 esi día mesmu a hora última de la tarde.
Xixón enfréntase nesta fase final a Aarhus (Dinamarca), Pafos (Xipre), Porto (Portugal), Donostia (España), Sevilla (España) y Zagreb (Croacia).
Fortaleces de Xixón
“Vamos poner el focu nes personas, el verdaderu atractivu de la ciudá, y vamos amosar al xuráu cómo Xixón pasó de ser eminentemente industrial a una ciudá que supo reinventase, convirtiéndose en referente del turismu de calidá, base d’empreses tecnolóxiques y d’innovación (Parque tecnolóxicu) y de centros d’investigación (Milla del conocimientu)”, esplica l’alcaldesa Ana González. Xixón va sorrayar l’amplia esperiencia de so en programes de calidá, sostenibilidá, accesibilidá y anovación, l’apueste por eventos culturales internacionales, la dixitalización y l’emplegu de les nueves teunoloxíes y la xestión turística y de congresos de la ciudá, ente otros aspeutos.
Los ganadores del títulu de Capital Europea del Turismu Intelixente 2023 van recibir sofitu en comunicación y desendolcu de marca pa promocionar el destín, una escultura en forma de hashtag xixante pal centru la ciudá, un videu promocional que represente’l destín y práutiques de turismu intelixente y aiciones publicitaries diseñaes dafechu pa elevar el perfil de la ciudá a nivel internacional y aumentar el númberu de visitantes.
La Capital Europea del Turismu Intelixente ye una iniciativa de la UE, financiada anguaño pol programa COSME, empobináu a promover el turismu intelixente na Xunión Europea premiando ciudaes polos enfoques anovadores n’accesibilidá, dixitalización, sostenibilidá y padremoñu cultural y creatividá. Basada na esperiencia esitosa d’una aición preparatoria propuesta pol Parlamentu Europeu, la iniciativa busca fomentar un desendolcu turísticu novedosu, inclusivu y sostenible, asina como l’espardimientu ya intercambiu de buenes práutiques.
