L’alcaldesa de Xixón, Ana González, presentó güei la propuesta de la ciudá asturiana pa la convocatoria nueva de Planes de Sostenibilidá Turística en Destinos, proyeutu entamáu pola Secretaría d’Estáu de Turismu. Estos planes tán empobinaos a ameyorar la competitividá y el so envís ye avanzar na tresformación de los destinos turísticos hacia un modelu basáu na sostenibilidá nes sos tres dimensiones: económica, medioambiental y territorial.
Xixón presenta asina’l so plan, que se titula “Gijón/Xixón, identidad, sostenibilidad y digitalización”, ente’l Principáu, que va facer una esbilla primera de tolos planes presentaos poles alministraciones llocales d’Asturies. Esos planes esbillaos van pasar un filtru segundu de la Secretaría d’Estáu de Turismu, que va ser, finalmente, la qu’escueya los planes que van entrar nesta convocatoria.
El plan prevé una inversión global de 2.540.586€, que taría financiáu a partes iguales pol Ayuntamientu, la Comunidá Autónoma y l’Estáu.
“El plan afonda nel trabayu que se lleva faciendo dende va años en Xixón por ser un destín turísticu sostenible. Nun hai que s’escaecer que va cuasi diez años que nos convertimos nun destín cola certificación Biosphere. Amás, les actuaciones enmárquense na planificación de Destín Turísticu Intelixente”, comenta Ana González, alcaldesa de Xixón.
La propuesta xixonesa inclúi actuaciones diferentes que s’estructuren en 3 exes y se desendolcaríen en 3 años: planificación gobernanza y xestión; recuperación y puesta en valor del patrimoniu pa usu turísticu; promoción y comunicación.
Ente les aiciones incluyíes destaca la recuperación pa usu turísticu de tres de los elementos de defensa marítima fundamentales nel patrimoniu de Xixón, que formen parte del sistema de bateríes de defensa de finales del XIX y que se construyeron a principios del XX. Intervendríase sobre les Bateríes Baxa y Alta de Santa Catalina, en Cimavilla, y sobre la Batería asitiada nel Cabu de San Llorienzo.
Tamién se contempla la recuperación del refuxu antiaéreu de la Guerra Civil en Cimavilla y l’estudiu del qu’esiste sol paséu de Begoña, que podría sirvir pa complementar el productu turísticu.
Otra de les actuaciones destacaes ye la dixitalización del discursu museográficu de las Termes Romanes de Campu Valdés col emplegu de téuniques de realidá aumentada, realidá virtual, videu mapping y otres teunoloxíes. Con esta actuación, persíguese aniciar el procesu de tresformación dixital que consiga actualizar y posicionar la potente rede d’espacios y recursos culturales de Xixón.
Les actuaciones que completen la propuesta son l’ameyoramientu y dixitalización de fluxos de visitantes en Cimavilla, la creación de una oficina turística intelixente, un plan de comunicación y promoción y la xestión, siguimientu y evaluación del plan.
“L’oxetivu xeneral ye consolidar Xixón como destín turísticu cultural ya intelixente; avanzar na tresformación dixital, ameyorar la esperiencia del turista, controlar los fluxos de visitantes y trabayar por un destín seguru y sostenible; conservar y divulgar el patrimoniu hestóricu y arquitectónicu; diversificar la ufierta de recursos turísticos y buscar mercaos nuevos pa romper cola estacionalidá; incrementar la competitividá y el posicionamientu”, esplicó Daniel Martínez Junquera, director de Xixón Turismu.
