El Conceyu de Xixón ratificó la so intención de xuntase a la rede autonómica d’escueles de 0 a 3 años, Les Escuelines. Asina lo fixo tres la xunta caltenida pola conseyera d’Educación, Lydia Espina, cola alcaldesa, Carmen Moriyón, entamada pa falar tanto de la llei, que ta en fase de tramitación, como pa intercambiar información del conceyu y resolver posibles duldes sobre’l procedimientu.
Mientres la xunta, Moriyón confirmó la voluntá del conceyu de xuntase a la rede pública, autonómica y gratuita, que va empezar a funcionar a partir del próximu mes de setiembre. D’esta manera, Educación suma’l respaldu d’un total de 25 conceyos, ente los que yá s’atopen Xixón y Uviéu.
Pela so parte, Espina avanzó una estimación de les cifres que’l consistoriu xixonés va tener qu’abonar en conceutu de compensación y que se van concretar más palantre nel conveniu individual d’integración que tendrá de roblar cada consistoriu. Moriyón calificó la cantidá de “asumible”.
Per otru llau, dambes aldericaron sobre los beneficios sociales y educativos d’esti proyectu pol que l’Alministración va responsabilizar de la xestión íntegra de les escueles municipales que s’incorporen a la rede. Tamién repasaron la planificación pa esti cursu, que pasa por abrir un total de 3 unidaes, con 39 places, nel CP Asturies.
