Xixón suspende dos selmanes tolos actos públicos

0
690
Teatru Xovellanos de Xixón

El Conceyu de Xixón va suspender tolos actos públicos a partir de mañana xueves y mientres los próximos 14 díes. Ye una midida preventiva pa evitar l’espardimientu del coronavirus. Asina lo indicó en rueda de prensa esta mañana la vocera del equipu de Gobiernu, Marina Pineda. La conceyala insistió en qu’en Xixón «nun tamos, pel momento, énte un problema de salú pública, pero enfrentamos a un virus que se tresmite con facilidá y el meyor midida pa evitar andaes ye la prevención».

«Nestos momentos solamente hai una persona contaxada na ciudá, que permanez ingresada nel HUCA, y otres dos en cuarentena», esplicó la edil. Pineda aportunó na necesidá de «tomase en serio» les midíes d’autoprotección, como llavase les manos de cutiu y tapase la boca col coldu a la de tusir o espirriar. Tamién s’aconseya guardar una distancia d’un metro al caltener conversaciones con otres persones y nun allegase a actos multitudinarios.

El Conceyu y les empreses y fundaciones municipales van suspender los viaxes fora d’Asturies pa protexer a los trabayadores municipales. Gradiarase la entrada nos vestuarios del personal que precise camudase de ropa pa trabayar coles mires d’evitar la concentración de munches persones al empar. Los colectivos de riesgu van poder trabayar dende casa nos casos nos qu’esto nun sía posible o va facilitáse-yos un permisu retribuíu.

Pieslle del Xovellanos

L’actividá nel Teatru Xovellanos va vese afectada tamién por estes midíes, quedando suspendíos les actuaciones previstes mientres estos próximos 14 díes. Coles mesmes van cerrase los centros sociales de mayores y les sales de llectura de les biblioteques y centros municipales. Amás, queden suspendíos los cursos de la Universidá Popular y los talleres y actividaes que s’imparten na rede de museos municipales.

Tamién se van cancelar tolos actos multitudinarios nos salones d’actos nos centros municipales integraos y equipamientos municipales. Pela so parte, el Patronatu Deportivu Municipal suspende los xuegos deportivos escolares y asume la midida de celebrar los eventos deportivos a puerta zarrada ensin públicu asistente.