Xixón va acoyer el prólogu de la Golden Globe Race del 6 al 14 d’agostu. La ciudá asturiana va convertise asina na sede de la flota de la vuelta al mundu a vela, que representa a 13 nacionalidaes, nuna selmana d’eventos y preparación al rodiu de los valores de la navegación en solitariu y les travesíes d’aventura. Arriendes d’ello, va haber, delles actividaes empobinaes a la ciudadanía, entá por definir, demientres la estancia de los participantes en Xixón.
“Ye un gran honor acoyer na nuestra ciudá’l el prólogu de la Golden Globe Race. Xixón tien toles condiciones precises pa recibir a los y les navegantes y tola organización, que van atopar equí la sede perfeuta pa preparase pa esti eventu náuticu de sonadía”, asegura Ana González Rodríguez, alcaldesa de Xixón.
La organización d’esta regata escoyó Xixón por ser un destín turísticu d’ésitu que yá acoyó una montonera d’eventos náuticos nos 30 años caberos, afitándose como destín tradicional de delles regates y rallyes oceánicos franceses como La Barquera, Pornic-Xixón, Gascogne-Asturias o Royan-Xixón. Tamién foi la escala de delles clases de regates oceániques, como la Figaro, Mini 6,50, Class 40 y IMOCA 60.
“La Golden Globe Race agradez al Conceyu de Xixón y a Visita Xixón la so collaboración nesti evento de sonadía”, comenta Don McIntyre, presidente y fundador de la Golden Globe Race. “va ser la primer vegada que los navegantes van aconceyar nel mesmu llugar y, pa munchos, la primer vegada que visiten Xixón, una ciudá marítima reconocida pola so hospitalidá, cultura y gastronomía”, añade.
La flota de la Golden Global Race va facer escala nel Puertu Deportivu de Xixón, avezáu a acoyer a navegantes internacionales con unes instalaciones modernes nel corazón de la ciudá. Los participantes van afayase una selmana iguando los sos barcos y asistiendo a les sesiones informatives de seguridá, pero tamién van tener tiempu pa escubrir y disfrutar de la ciudá na so estancia.
“Esti ye un apueste claru de la nuestra ciudá por toles actividaes venceyaes a la mar y refuercia esi venceyu íntimu col Cantábricu que ye, quiciabes, la característica cimera de la nuestra identidá como xixoneses y xixonesas”, reconoz Daniel Martínez Junquera, direutor de Visita Gijón/Xixón.
Los y les navegantes de la Golden Global Race van colar de Xixón el domingu 14 d’agostu nel SITraN Challenge Race, una regata de 280 milles hacia Les Sables d’Olonne, sede de la GGR, a tiempu pa la apertura del Race Village el 20 d’agostu de 2022. Son namás dos selmanes pa la preparación final de los barcos y navegantes, enantes de la salida de la vuelta al mundu’l 4 de setiembre.
«Toi percontentu porque la ciudá de Xixón faiga hestoria cola llexendaria GGR. La ciudá española -la nuestra prima- va llanzar el prólogu d’una aventura que promete ser emocionante”, conclúi Yannick Moreau, alcalde de Les Sables d’Olonne. “Al otru llau del Golfu de Biscaia, los pantalanes de Les Sables d’Olonne van aguardar a los patrones pa 2 selmanes de fiesta enantes del Día D… La presión medra pa los que tan a puntu de participar nel eventu deportivu más llargu del mundu”.
Sobro la Golden Globe Race
La Golden Globe Race ye la vuelta al mundu a vela orixinal. En 1968, demientres el ser humanu se preparaba pa dar los pasos primeros na lluna, un mozu apacible y modestu embarcóse nun viaxe d’escubrimientu pa valtar récords.
Les regates n’alta mar camudaron pa siempres con aventureros/es y navegantes, inspiraos por Sir Robin Knox-Johnston, que siguieron la so buelga pionera. Nueve homes aniciaron la primer regata en solitariu ensin escales alredor del mundu. Namás ún terminó. Fízose hestoria. Navegando con un sextante, cartes de papel y un reloj precisu y fiable, Sir Robin dio la vuelta al mundu.
En 2018, pa celebrar los 50 años d’aquella primera fazaña que valtió’l récor, remaneció la Golden Globe Race. Darréu, atraxo l’atención de los medios de comunicación de tol mundo y de los aventureros, cautivaos pol espíritu y la oportunidá. La regata orixinal tornó.
