Después del so tresllaú a Xixón, CometCon lleva más d’un añu iguando la que sedrá la edición con más superficie útil y stands de la hestoria.
La edición novena de la CometCon, que va entamase los díes 3-4-5 de setiembre nel Recintu Ferial Luis Adaro, va tener más de 18.000m2 de superficie pal desendolcu de tol programa d’actividaes.
La organización considera que, poles midíes sanitaries y pola montonera de conteníos que xenera, la opción meyor foi espander la so idea orixinal de dos pabellones a cuatro, col envís d’abarcar tol conteníu y nun dexase nada no que promete ser una de les ediciones meyores de la CometCon.
“CometCon tien una deuda con Xixón, ciudá que nos recibió colos brazos abiertos y a la que, col andanciu, nun pudimos amosar tol nuesu potencial”, declara Héctor Lasheras, direutor del festival.
CometCon va tener un aforu de cuasi 5.000 persones en más de 18.000 metros cuadraos. La organización decidió, motu propio, amenorgar l’aforu al 50% en vez del 75% qu’afita la llei, por responsabilidá.
Anguaño, la organización apuesta por espacios nuevos como’l pabellón Festimarket, empobináu a los y les más pequeñes, con hinchables, mercadín de vieyo, restauración y airsoft; o el pabellón PCBOX (renomando asina al pabellón Liberbank), que va cuntar con espacios de realidá virtual, simuladores de conducción y más de 50 equipos informáticos con competiciones d’e-sports a nivel nacional.
La CometCon va amosar, pola primer vez n’Asturies, una esposición a escala 1:1 de figures de Star Wars acompangaes de bustos, traxes y mázcares. Artiendes d’ello, va cuntar cola asociación con más de 150 collaboradores.
Como ye vezu, la organización caltién y apuesta por conteníos venceyaos al cosplay, kpop y youtube. Na edición d’anguaño, el comunicador y youtuber QuamtumFracture, que tien 2,7 millones de suscriptores, va afayase no que la organización define como “La CometCon más divulgadora”.
El programa, qu’axunta más de 100 actividaes, va tar especialmente centráu nel mundu de Youtube, los concursos, la cultura maker y les charres y alderiques al rodiu la cultura pop.
Finalmente, CometCon caltién los sos compromisos sociales, con protectores d’animales, asociaciones de llucha escontra’l cáncer, fomentu del usu del asturianu -cola torna de la cartelería- y la presencia d’entidaes del tercer sector mozo de Xixón.
