Xixón va entamar del 4 al 6 d’ochobre’l XVI Alcuentru de la Rede de Ciudaes Educadores como coordinadora d’esti organismu mientres el periodu 2022-2023. Asina lo anunció la conceyala d’Educación, Natalia González Peláez, na Asamblea Xeneral de l’Asociación Internacional de Ciudaes Educadores que tuvo llugar ayeri y güei en Sevilla.

González Peláez espunxo, amás, les distintes propuestes que se llevaron a cabu dientro d’esta etapa de coordinación de RECE, ente les que s’atopa’l desenvolvimientu d’un Plan d’Acción pa xenerar momentos y espacios d’alcuentru ente les ciudaes miembru de RECE.

Celebráronse eventos inspiradores colos que promover l’alderique y la reflexón. Del 28 de payares al 1 d’avientu tuvieron llugar les II Xornaes d’Educación y Hestoria con Memoria, retresmitíes a toles ciudaes de la Rede en formatu telemáticu. Ta rellacionáu col grupu de trabayu de la Comisión de Siguimientu de RECE sobre Ciudaes educadores: ciudaes con memoria’ que’l so fin ye cavilgar avera del papel de los conceyos nes polítiques de recuperación de la memoria democrática. Nel mesmu participen, amás de Xixón, Gasteiz, Rivas Vaciamadrid, Granollers y Lleida.

Per otru llau, el nuesu conceyu forma parte de les 3 redes temátiques que tán funcionando dientro de RECE anguaño: Tresformamientu de la ciudá (Axenda Urbana) dende y cola perspectiva de la infancia y l’adolescencia, coordinada por Rivas-Vaciamadrid; La Ciudá Educadora na formación y l’empléu, coordinada per Málaga; y La Ciudá Educadora frente a la cultura del odiu, coordinada per Sevilla.

La concejala tamién recordó na Asamblea Xeneral qu’el 13 de marzu tuvo llugar la xornada Habitar Ciudaes Educadores pa promover la salú infantil al traviés de la movilidá saludable y les redolaes escolares seguros, y que’l próximu 13 d’abril ta prevista una xornada sobro Evaluación de programes educativos.