Yolanda Huergo: «Nun ye’l resultáu qu’esperábemos»

La candidata de Podemos-Equo valora que "la nuesa presencia ye importante nes instituciones y tenemos munches ganes"

0
159
Laura Tuero, Yolanda Huergo, Mario Suárez, Daniel Ripa y Lorena Gil, esti domingu, en Xixón. / Podemos
Laura Tuero, Yolanda Huergo, Mario Suárez, Daniel Ripa y Lorena Gil, esti domingu, en Xixón. / Podemos

Yolanda Huergo nun ocultó esti domingu la so decepción pol resultáu de la coalición Podemos-Equo nes elecciones municipales d’esti 26-M. «Nun ye’l resultáu qu’esperábemos. Cometimos errores y tenemos qu’asumilos», esplicó depués de felicitar al PSOE pol so trunfu. «Tamos onde la ciudadanía nos quixo colocar», aseguró, al tiempu que destacó que los tres conceyales de la formación van ser decisivos: «La nuesa presencia ye importante nes instituciones y tenemos munches ganes».

Huergo nun quixo entrar en valoraciones, anque achacó’l mal resultáu al arrastre de la victoria socialista nes caberes elecciones xenerales. «Vamos poner tol nuesu enfotu en llevar a cabo les polítques que creemos que tenemos que sacar alantre. «La renta social, les escueles de 0 a 3 son pilancos fundamentales na nuestra manera de tar nes instituciones», concretó.

«Nun podemos defraudar»

El secretariu xeneral de Podemos na ciudá, Mario Suárez del Fueyo, valoró esti llunes que la coalición caltuvo 16.118 votos y el 12,8% con tres conceyales. «Nun podemos defraudar a la xente que nos votó. La renta social, la llucha contra la contaminación, la depuradora del Esta… Esi va ser el nuesu trabayu». Del Fueyo llamentó la falta d’entendimientu con Izquierda Xunida pa sacar alantre una candidatura conxunta y nun descartó un pactu con Ana González. «El PSOE tien una mayoría que-y permite gobernar y va ser el PSOE quien decida cómo va xestionar esa mayoría».