Resultaos de les elecciones municipales 2019 en Xixón

Folixa na Casa’l Pueblu de Xixón. El PSOE barrió esti domingu nes elecciones municipales y llogró una bultable victoria al sumar once conceyales. La candidatura d’Ana González llogró’l sofitu de 46.465 xixoneses, 11.360 papeletes más que va cuatro años, lo qu-y abre dafechu les puertes de l’Alcadía. La socialista amosóse satisfecha tres conocer el resultáu del escrutiniu. «Siéntome yá alcaldesa».

El PSOE tendralo fácil pa llograr l’Alcaldía. Ana González va poder ser alcaldesa de la ciudá en solitariu. La suma de les cuatro fuercies de la derecha ye de doce conceyales, una cifra que nun algama la mayoría absoluta (14). La Llei de Réximen Electoral Xeneral establez qu’en casu de nun algamáse mayoría, l’alcaldía ye pal candidatu de la llista más votada. Y nesi casu, Ana González ye la clara ganadora.

Pactos

Lo que sí va necesitar la candidata socialista son pactos pa sacar alantre les sos midides. La   próxima alcaldesa de la ciudá va poder buscar la complicidá de Podemos-Equo. La coalición que llidera Yolanda Huergo queda con la metá de los conceyales que tenía Xixón Sí Puede. Dexa pel camín 13.742 votantes, pasa del 21,10% del votu al 11,87% y queda con tres representantes nel Plenu, suficientes pa sumar la mayoría col PSOE. La candidatura Xixón por la Izquierda, d’IX y IAS, tamién vio amenorgada la so representación na Casa Conceyu, al pasar de dos a un conceyal y 3.109 papeletes menos.

Ún de los grandes trunfadores de la nueche foi Ciudadanos. La candidatura de José Carlos Fernández Sarasola sumó 10.103 votos y tres conceyales, convirtiéndose na segunda fuercia política de la ciudá. Foru pasa a la tercer posición con tres representantes. La candidatura d’Álvaro Muñiz pierde más de la metá de la representación que llograra Carmen Moriyón en 2015. El PP d’Alberto López-Asenjo caltuvo los tres conceyales colos que ya cuntaba. Bon resultáu pa Vox, qu’entra con dos conceyales. Eladio de la Concha atropó 9.517 votos, un 7,01%.