El conseyeru d’Ordenación del Territoriu, Urbanismu, Vivienda y Derechos Ciudadanos, Ovidio Zapico, anunció güei que’l gobiernu va comprar suelu en Xixón pa impulsar la construcción de pisos públicos énte’l “bloqueu sistemáticu” del conceyu a la cesión de tarrenes.
En rempuesta a una pregunta del grupu popular na Xunta Xeneral, Zapico calificó esta situación de “escepcional” y defendió la necesidá d’adoptar midíes estraordinaries pa evitar que la ciudadanía xixonesa “quede en segunda división en materia de polítiques públiques de vivienda”. Nesti sen, señaló que l’alministración llocal, gobernada por Foro y PP, impidió la puesta a disposición del gobiernu asturianu de suelu públicu magar de los alcuerdos algamaos meses atrás, polo que la conseyería va actuar directamente pa garantizar nueves promociones.
El titular de Derechos Ciudadanos fixo esta anuncia tres la denuncia fecha’l pasáu fin de selmana pol grupu municipal d’IU en Xixón, nel que recordaba que l’alcuerdu unánime del plenu municipal pa impulsar les polítiques de vivienda incluyía’l compromisu d’establecer un marcu de collaboración col Principáu y facer efectiva, nel primer trimestre de 2026, la cesión de suelu a la conseyería pa construyir hasta 300 viviendes públiques d’alquiler asequible, un plazu que termina ensin que se producieren avances.
Zapico reafirmó’l compromisu del Gobiernu d’Asturies d’algamar les 1.500 viviendes públiques remataes, en construcción o llicitaes al final de la llexislatura, y insistió en qu’un de los principales retos ye la disponibilidá de suelu. “Énte’l bloquéu d’una Administración, esti gobiernu respuende con soluciones pa garantizar un derechu”, concluyó.