El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, anunció na Xunta Xeneral que les nueves directrices eóliques nes que trabaya’l Gobiernu d’Asturies van incluyir el conceptu de capacidá de carga del territoriu, van apostar pola reutilización de los parques al traviés de la repotenciación de les instalaciones y van obligar a la restauración de los espacios en casu de cese l’actividá.
“El necesariu desenvolvimientu per parte de la iniciativa privada d’unes instalaciones d’interés públicu rique d’un marcu regulatoriu estrictu, que garantice l’interés xeneral y, sobre manera, d’una organización y planificación previa per parte de l’Alministración pública que nun resulten delegables”, precisó Zapico énte la comisión del ramu del Parlamentu.
Amás, esplicó qu’esta fase inicial, la de proposición de les necesidaes, correspuende a la Conseyería de Transición Ecolóxica, Industria y Desenvolvimientu Económicu, al traviés de la Dirección Xeneral d’Enerxía. Nesti sentíu, espresó’l so enfotu en qu’esa propuesta d’actuaciones remate a lo llargo d’anguaño y empecípiese asina’l trámite per parte de la Dirección Xeneral d’Ordenación del Territoriu”, coles mires de que les nueves directrices sectoriales s’aprueben nesta llexislatura.
Al respective de la planificación, el conseyeru valoró l’estudiu previu y rigorosu” de les necesidaes enerxétiques de la comunidá que yá se ta ellaborando, según la conveniencia de replantegase’l potencial de xeneración eólica d’Asturies, la so distribución nel territoriu y los usos deseables. Al so xuiciu, estos analises van dexar cuantificar les posibilidaes d’esportación d’esta enerxía.
Tocantes a la zonificación, Zapico señaló que “nun paez posible que les zones que yá fueron escluyíes puedan ser oxetu de nuevos desendolques”. Igualmente, aseguró que la instalación de parques va tener de cuntar col vistu bonu de los conceyos nos que se desendolquen, anque esta nun va ser la única condición pa la so aprobación.
A lo último, abogó por repotenciar les actuales instalaciones, “una y bones les nueves tecnolóxiques dexen multiplicar casi por cuatro la capacidá de los molinos”.
