El Gobiernu d’Asturies repite’l so compromisu humanitariu con Palestina y garantiza la dotación d’ayuda pa esta población, una de les llinies prioritaries de la estratexa de cooperación al desenvolvimientu. L’Executivu sofitó la reconocencia oficial del Estáu de Palestina aprobáu pol Gobiernu d’España, col que se suma a los más de 140 países que yá lo fixeron, y, coles mesmes, apela a la paz y el cumplimientu del derechu internacional.
L’Axencia Asturiana de Cooperación al Desenvolvimientu lleva años emprestando sofitu a la población palestina, a la que destinó 1,3 millones dende 2019. L’organismu aportuna na necesidá del altu al fueu y l’apertura de corredores humanitarios pa que l’ayuda pueda llegar a la Franxa de Gaza, zona que sufre la ofensiva militar israelín dende ochobre de 2023.
Esti mesmu mes, la Conseyería de Derechos Sociales y Bienestar, de la que depende l’axencia, aprobó una ayuda d’emerxencia de 75.000 euros pa un proyectu de sofitu sicosocial que busca amenorgar l’impactu de la violencia que sufre la población infantil y nuevo. Amás, el pasáu ochobre destináronse otros 118.900 euros pa les necesidaes básiques de los y les gazatíes, dientro del llamamientu d’emerxencia de l’axencia de la ONU pa la población palestina refuxada (UNRWA, poles sos sigles n’inglés).
Les fontes oficiales suman más de 35.500 persones finaes en Gaza y 79.500 feríes. Dende’l 12 de mayu, los centros de salú nun recibieron material médico y namás el 33% de los equipamientos sanitarios funcionen parcialmente polos ataques repitíos y la escasez de suministros médicos vitales, combustible y personal. Coles mesmes, envaloren que se precisen a lo menos 500 camiones diarios pa caltener la salú de los habitantes de la franxa. N’abril namás entraron 5.600 vehículos con asistencia humanitaria y esti mes la cifra nun supera los 1.400, según fontes de la Oficina d’Asuntos Humanitarios de la ONU.
L’Axencia de Cooperación desenvuelve dos llinies de collaboración cola población palestina yá consolidaes. Per un sitiu, con UNRWA; per otru, col Comité de Solidaridá cola Causa Árabe. Amás, intervien en proyectos con otres oenegés; por casu, el que se llevó a cabu dende 2021 cola Asamblea de Cooperación pola Paz. El Gobiernu d’Asturies estima y sorraya el llabor de toes estes organizaciones.
