La Conseyería de Cultura, Política Llingüística y Deporte convocó una nueva edición del programa Llaboral Cinemateca Curtios pa promocionar y distribuyir la producción audiovisual asturiana. Gracies a esta iniciativa espublízase la llabor de los y les realizadores asturianes o residentes n’Asturies nos certames cinematográficos nacionales ya internacionales.
Al traviés d’esti proyectu, avánzase na profesionalización de la industria cultural, con especial enfoque nel sector audiovisual. A esta convocatoria van poder presentase tolos curtios producíos dempués del 1 de xineru de 2024.
Les inscripciones van permanecer abiertes hasta’l domingu 10 de payares y les bases de la convocatoria y el formulariu d’inscripción tán disponibles en www.laboralcinemateca.es
Na selección de curtiumetraxes valoraránse la so orixinalidá, calidá artística y técnica y la participación significativa d’equipu técnicu y artísticu asturianu. Los curtios escoyíos van pasar a formar parte del catálogu de distribución de Llaboral Cinemateca que, mientres dos años, va encargase d’inscribilos de forma personalizada nos eventos y festivales más destacaos.
Llaboral Cinemateca Curtios ye’l proyectu de distribución de curtiumetraxes asturianos de Llaboral Cinemateca, l’espaciu dedicáu al sector creativu cinematográficu y audiovisual que promueve la Conseyería de Cultura, Política Llingüística y Deporte al traviés de Llaboral Ciudá de la Cultura.
