Zapico reivindica’l cambéu d’aldu de la política de vivienda con 621 nuevos pisos y 86 millones n’ayudes esta llexislatura

El conseyeru d’Ordenación del Territoriu, Urbanismu, Vivienda y Derechos Ciudadanos, Ovidio Zapico, reivindicó na Xunta Xeneral el cambéu d’aldu impulsáu na política de vivienda dende l’entamu de la llexislatura. Nesti contestu, destacó qu’Asturies cunta yá con 621 pisos públicos terminaos o n’execución y que’l gobiernu convocó 86 millones n’ayudes nesti ámbitu en pocu más d’un añu.

Zapico defendió que l’actuación de la conseyería respuende a trés oxetivos fundamentales: ampliar el parque públicu, intervenir nel mercáu cuando resulte necesario y correxir los defectos detectaos na xestión. Nesti sen, señaló que l’informe de la Sindicatura de Cuentes referíu a 2023 y 2024 confirma la esistencia de faltes yá identificaes pol so departamentu. “Había una serie de defectos qu’hai que reconocer porque taben ehí y que nunca despinté”, afirmó.

Pa encarar esos problemes, la conseyería trabaya na meyora del sistema de vivienda protexida, la revisión de los procedimientos d’axudicación y el refuerzu de l’actividá inspectora. Como exemplu, el conseyeru destacó que Vipasa realizó 1.916 inspecciones mientres 2024, un datu que nun recueye l’informe de la Sindicatura.

Al respective de los fondos europeos destinaos a la promoción de vivienda, Zapico aseguró que “nun ta en riesgu nin un solu euro”. Según esplicó, toles promociones previstes con esta financiación tán yá en marcha. Ente elles, citó les doce viviendes de L’Arena, en Sotu’l Barcu, y otres doce na cai de Francisco Legorburu, n’Avilés, que yá fueron recepcionaes. Amás, refugó que se perdieren les 29 viviendes vinculaes al proyectu de La Maletería, n’Uviéu. Nesti puntu, esplicó qu’esta actuación dispón d’otra vía de financiación y que, tres de la reorganización de les partíes presupuestaries, tán construyéndose en Grau 24 pisos públicos destinaos al arriendu afayadizu, con una inversión cercana a los cinco millones.

A estes actuaciones súmase la incorporación de 21 viviendes públiques en Candás, gracies a la captación de financiación comunitaria adicional. Esta promoción, que nun figuraba primeramente na planificación estatal, cunta con una inversión superior a los cuatro millones.

En cuanto al balance de la llexislatura, Zapico recordó que les 621 viviendes terminaes o n’execución formen parte d’una estratexa pa incrementar el parque públicu residencial, una llinia de trabayu que va siguir nos próximos meses con nueves promociones. Ente elles, citó la de Sotrondio, en Samartín del Rei Aurelio, llicitada la pasada selmana.

Zapico tamién punxo en valor l’esfuerzu realizáu en materia d’ayudes a la vivienda. En pocu más d’un añu, el Boletín Oficial del Principáu (Bopa) publicó convocatories por valor de 86 millones destinaes al arriendu, el Bonu Arriendu Nuevu, la rehabilitación, la meyora de l’accesibilidá, la eficiencia enerxética y les fórmules residenciales collaboratives, como’l cohousing.