L’agua corriente y la lluz llétrica son dos servicios qu’anguaño nos paecen de lo más normal y de los qu’esfrutamos acaldía. Sicasí, la ciudá de Xixón nun tuvo estos servicios hasta l’añu 1890, ye dicir, va 133 años. Esti fechu, que marcó un antes y un dempués na vida de la villa, recoyóse de tal manera n’El Comercio, decanu de la prensa asturiana.
Per un llau, el 1 de febreru de 1890 el diariu recoyía que «el domingu próximu, 2 de febreru, va tener llugar la inauguración del usu y aprovechamientu d’agües potables del manantial de Llantones, y actu tan trescendental pal bientar y desendolcu d’esta floreciente villa, esixe una solemne manifestación de públicu». Asina, nun actu na ilesia de San Pedro, la corporación municipal dio les gracies a Dios por esti fechu.
D’otra manera, l’avisu de la llegada de la lluz llétrica a Xixón producióse nel mesmu diariu el día 30 de xunetu. Asina se narraba nes sos páxines: «Vimos, con satisfacción, que les primeres instalaciones de lluz llétrica, feches pola fábrica de gas nel comerciu del señor Rollán, na confitería del señor Rato y nel Café Oriental, en nada ceden nin pola so brillantez, nin pola so fixeza ya intensidá a les que tuvimos ocasion de ver establecíes en delles poblaciones y poles fábriques más acreditaes.
