La Conseyería d’Educación empecipió esta fin de selmana la cuarta edición de les pruebes de certificación de llingua asturiana, nos niveles entemediu (B2) y avanzáu (C1), cola parte escrita. Los exames celebráronse na see de la Escuela Oficial d’Idiomes d’Uviéu.
Anguaño hai un total de 218 persones almitíes, de les que 129 tán inscrites pa consiguir el nivel B2 y les 89 restantes opten al C1.
Estes pruebes tomen como referencia los oxetivos, les competencies, los conteníos y los criterios d’evaluación establecíos nel Decretu 47/2019, de 21 de xunu, que regula la certificación correspondiente a dichos niveles afechos al Marcu Común Européu de Referencia pa les Llingües (MCER).
Dambos niveles consten de cinco partes: comprensión de testos escritos, compresión de testos orales, producción y coproducción de testos escritos, producción y coproducción de testos orales y mediación. Pa llograr el certificáu ye necesariu llograr, a lo menos, una puntuación de 5 en caúna de les partes y un promediu de 6 ente toes.
La conseyería constituyó trés tribunales: dos pa evaluar el nivel B2 y unu pa calificar la prueba del C1. Toos tán formaos por profesoráu funcionariu de carrera del Cuerpu de Profesores d’Enseñanza Secundaria y por llingüistes espertos en llingua asturiana.
Educación encargóse de la convocatoria, ellaboración, inscripción, loxística, organización y aplicación de les pruebes. Tamién va expedir los certificaos de superación al traviés del centru desaminador.
Amás, informó a los 218 aspirantes convocaos de tolos detalles de les pruebes al traviés d’un pormenorizáu documentu. Tamién s’ufiertaron a les persones interesaes unos modelos de pruebes de convocatories anteriores pa que sirvan de referencia y que pueden llograse na plataforma www.educastur.org
Tocantes a los exames orales (bloque II), van realizase nel Institutu Alfonso II d’Uviéu/Uviéu, a partir del llunes 9 d’ochobre, en convocatories personalizaes n’horariu de tarde.
