N’Uviéu, nel contestu de les Fiestes Populares de San Matéu 2026 (que se celebren del 10 al 21 de setiembre), prodúxose un grave ataque de calter fascista.
Un grupu d’ocho ultraderechistes agredió a dos militantes del colectivu AMA Asturies.
L’ataque tuvo llugar na caseta de les Fiestes Populares, asitiada na plaza La Catedral, mientres el primer día de festividaes. Los agresores, qu’amás profirieron glayíos de «Arriba España», «rojos de mierda» y «guarros», vandalizaron la caseta y arrancaron un faldón-bandera LGBTB.
Foi nesi momentu cuando les dos persones voluntaries intentaron torgar los daños y resultaron agredíes.
Tres l’agresión, les víctimes fueron treslladaes al HUCA, onde recibieron atención médica, incluyíos un escáner y puntos de sutura nunu de los casos, enantes de ser daes d’alta.
AMA Asturies, al traviés del so comunicáu, espresó la so firme oposición a esti tipu d’actos: «Ni 8 ni 800 fascistes van quitanos les ganes de siguir llenando Asturies de color. Una minoría violenta nun va consiguir que volvamos a tiempos grises». Amás, rellacionaron l’agresión col clima políticu, mentando’l discursu d’acosu de Vox escontra les sos casetes (al que Vox llama «propaganda política», pero que les Fiestes Populares definen como «Defensa de los derechos humanos, defensa de los derechos civiles y defensa de los derechos sociales») y criticando la midida del gobiernu del conceyu del PP d’Uviéu de retirar los bancos del arcu la vieya de la plaza de la Escandalera como primer midida de gobiernu.
La respuesta ciudadana va ser contundente. Convócase una manifestación pa güei sábadu 12 de setiembre a les 19:00h na plaza La Catedral pa «demostrar que n’Asturies somos más».
Les Fiestes Populares anunciaron que va redoblar la so presencia “realizando actos de repulsa contra la violencia fascista y a favor d’una ciudá multicolor».
Como reflexón final, dende los colectivos agredíos afírmase: «Frente a la so violencia y odiu, la nuesa allegría. Nun vamos dexar de reivindicar una ciudá más humana, más acoyedora y más inclusiva y llibre de fascismu».
Líderes políticos asturianos y españoles, asina como miles de persones tán yá amosando’l so refugu a estos fechos y la manifestación de güei columbra que va ser mui siguida.
