El Conseyu de Gobiernu va aprobar mañana, na so reunión selmanal. un gastu de 3.219.128 euros pa contratar les obres incluyíes na segunda fase del proyectu p’amenorgar el risegu d’inundaciones nel núcleu urbanu de Les Arriondes. Anguaño, los ríos Piloña y Chicu, al so pasu pola capital parraguesa, presenten tramos con capacidaes de desagüe inferiores a les necesaries en casu d’aveníes, una situación que s’acentúa pola presencia d’obstaculos puntuales, tanto nel cauce como nas márxenes. Los trabayos previstos pretenden prevenir daños y evitar los problemes que causen les crecíes.
L’actuación, que cunta con un plazu d’execución de 23 meses, inclúi diferentes intervenciones sobre dambos ríos y el so entornu. En concreto, les principales obres nel Chicu van consistir nuna amplicación de la sección de desagüe. Con esti fin, va construyise una muria lonxitudinal y una mota -un mónticulu realzáu de tierra- pa la protección escontra les aveníes na marxe derecha, concretamente ente l’Hotel Ribera del Chicu y el pasu de la carretera a Bodé. Tamién se va elevar el camín de ribera nesta marxe, ente la vía d’accesu a esta llocalidá y la confluencia del Chicu col Seya.
Amás, van executase meyores nel colector esistente, mesmo que nos drenaxes de les instalaciones de la piragüera municipal y del pasu baxo’l ferrocarril de la carretera a Bodé. Igualmente, va sustituise’l pasu de la riega baxo la carretera AS-260, paralela al ríu, y van construyise redes de drenaxe d’aguas de lluvia.
En cuanto al ríu Piloña, va elevase la rasante del tarrén na zona del parque de La Llera, onde tamién se va facer lo propio col tableru de la pasarela peatonal p’ameyorar la capacidá de desagüe, lo que va repercutir nun menor nivel d’agua nes zones colindantes col ríu. Por otra parte, van protexese con una muria la piscina y el camping ubicaos nesi área.
