La conseyera Melania Álvarez participó güei na reunión de la conferencia sectorial onde s’alcordó la distribución de fondos ente les comunidaes
Asturies va recibir anguaño 38.262.000 euros del Gobiernu d’España pa la recuperación económica y social de contornaes residenciales y la rehabilitación d’edificios públicos. La conseyera de Derechos Sociales y Bienestar, Melania Álvarez, participó güei na xunta telemática de la Conferencia Sectorial de Vivienda na que s’alcordó la distribución ente les comunidaes de los fondos procedentes del Plan de Recuperación, Tresformación y Resiliencia pa esti fin. Al alcuentru asistieron tamién el director xeneral de Vivienda, Fermín Bravo, y la directora xeneral d’Ordenación del Territoriu y Urbanismu, Sonia Ponte Landázuri.
Per una parte, la Conseyería de Derechos Sociales y Bienestar, al traviés de la Dirección Xeneral de Vivienda, va xestionar 27.957.000 euros pa la recuperación económica y social de contornaes residenciales. Esta partida va dexar impulsar acciones en 3.886 viviendes, nel ámbitu de la rexeneración y renovación urbana, con iniciatives como la restauración d’elementos constructivos y la rehabilitación integral d’edificaciones. Tamién va sufragar actuaciones vinculaes a la eficiencia enerxética, la sostenibilidá y la dixitalización, ente otres.
Per otru llau, la Conseyería de Mediu Rural y Cohesión Territorial va disponer de 10.305.000 euros correspondientes al Programa d’Impulsu a la Rehabilitación d’Edificios Públicos que va xestionar la Dirección Xeneral d’Ordenación del Territoriu y Urbanismu. Esti proyectu busca la rehabilitación sostenible del parque públicu institucional, con una visión integral y pa edificios alministrativos, educativos, asistenciales, deportivos, sanitarios, culturales, etcétera. Tamién se busca promover el calter integráu que reclama l’Axenda Urbana Española y apostar polos oxetivos esenciales de sostenibilidá, estética y inclusión. Estes actuaciones han buscar, amás, un aforru enerxéticu mediu de más del 30 %.
Otra manera, na conferencia sectorial alcordóse qu’Asturies reciba 12,1 millones l’añu que vien pa la construcción d’edificios enerxéticamente eficientes destinaos a viviendes d’arriendu asequible.
