El programa Bonu Comerciu Asturies arrancó con una gran acoyida tanto per parte de la ciudadanía como del texíu comercial. Los 300.000 bonos puestos a disposición del públicu escosaron el mesmu vienres 1 de mayu, día en que s’abrió’l plazu de descarga.
En total, 60.000 persones descargaron los bonos, lo que confirma l’eleváu interés por esta iniciativa del Gobiernu d’Asturies, diseñada pa sofitar al pequeñu comerciu y dinamizar el consumu llocal.
La campaña algama nesta edición una cifra récord de participación, con 1.317 establecimientos xuntaos repartíos por 38 conceyos asturianos. Son 123 comercios más que l’añu pasáu y súmense trés nuevos conceyos: Cuaña, Muros del Nalón y Ribedeva. Esta amplia implantación territorial y sectorial facilita l’accesu de la ciudadanía al programa y refuerza’l so impactu económicu.
Trátase de la tercer edición d’esti programa de sofitu al comerciu minorista, impulsáu pola Conseyería de Ciencia, Industria y Emplegu, que cunta con un presupuestu de 3 millones.
El Gobiernu del Principáu valora mui positivamente esti entamu de campaña y anima a les persones usuaries a trocar los bonos yá descargaos nos establecimientos participantes. El llistáu completu de comercios xuntaos pue consultase na web oficial del programa: https://bonoscomercioasturias.com/
Per conceyos, los que concentren un mayor númberu d’establecimientos participantes son Xixón (486), Uviéu (187), Avilés (132), Llangréu (60), Siero (56), Mieres (43) y Villaviciosa (34). El plazu pa realizar compres con descuentu va permanecer abiertu hasta’l 30 de xunu.
